खुकुरीको चोट कर्दलाई, कहाँ थाहा हुन्छ हजुर ।
जनताको मर्म नेतालाई, कहाँ थाहा हुन्छ हजुर ।।
गरिबको माग केहो भनेर, उनैलाई सोध्छौ तिमी ।
बालुवाटारमा बस्नेलाई, कहाँ थाहा हुन्छ हजुर ।।
राजनीति र प्रेम उस्तै उस्तै, भएका छन् यहाँ त ।
साथ के हो धोका दिनेलाई, कहाँ थाहा हुन्छ हजुर ।।
उनले छोडेर जाँदा मुसुक्क, हाँसेर बसे मपनि।
भित्री पीडा त तपाईंलाई, कहाँ थाहा हुन्छ हजुर ।।
स्वार्थ मिले जुड्छन रे, ती टुटेका सम्बन्धहरु ।
सोझा तपाईं र हामीलाई, कहाँ थाहा हुन्छ हजुर ।।
कञ्चनरुप नगरपालिका १२, रुपनगर, सप्तरी ।
