प्रकास कुमा मण्डल राजविराज । जलवायु परिवर्तनको कारण उच्च जोखिममा रहेको सप्तरीको तिलाठी कोईलाडी गाउँपालिकामा समुदायकालागि जलवायु उत्थानशीलता कार्यक्रम सञ्चालन भएको छ ।
तिलाठी कोईलाडी गाउँपालिकाको समन्वय तथा मर्सिकोर नेपालको सहयोगमा आसमान नेपालद्वारा खाँडो नदीमा आधारित सो कार्यक्रम सञ्चालन गरिने भएको छ ।
लक्षित समुदायहरू र पालिकामा जलवायु जन्य हानी तथा नोक्सानी कम गर्ने, बाढी र तातो हावाको लहरको पूर्वतयारी, अनुकूलन र पूर्वानुमानमा आधारित पूर्व कार्यलाई स्थानीय सरकारको योजना र नीतिहरूमा प्राथमिकीरण गर्ने उद्देश्यले कार्यक्रम सञ्चालन गरिएको आसमान नेपालका कार्यक्रम निर्देशक दिनेश्वर साहले जानकारी दिनुभयो ।
पालिकामा विपद् जोखिम न्यूनीकरण र जलवायु परिवर्तन अनुकूलन विशेष गरि बाढी र तातो हावाको लहरको पूर्वतयारी, अनुकूलन र पूर्वानुमानमा आधारित पूर्व कार्यका लागि सरकारी बजेट र स्रोत बढाउने कार्यक्रमको उद्देश्य रहेको कार्यक्रम निर्देशक साहले जानकारी दिनुभयो ।पहिलो चरणमा सो कार्यक्रम २०२७ सम्म सञ्चालन हुनेछ ।
तिलाठी कोईलाडी गाउँपालिका बाढीको अत्यन्तै जोखिममा रहेको कार्यक्रमको शुभारम्भ बैठकमा बोल्दै गाउँपालिकाका अध्यक्ष अरुण कुमार मण्डलले यस्ता परियोजनाहरूले गर्दा समुदायलाई उत्थानशील बनाउन मद्दत पुग्ने बताउनुभयो ।
तिलाठी कोईलाडी गाउँपालिकाका अध्यक्ष अरुण कुमार मण्डलको अध्यक्षतामा आयोजित सो कार्यक्रममा मर्सिकोर नेपालका संजित श्रेष्ठ, आसमान नेपालका विपद् कार्यक्रम ब्यवस्थापक विजयकुमार यादव, कार्यक्रम संयोजक डोरेन्द्र बस्नेत, कार्यक्रमको बारेमा प्रस्तुतीकरण गर्नुभएको थियो । सो अवसरमा वडा अध्यक्ष कमल कुमार मण्डल र गाउँपालिकाका विपद् ब्यवस्थापन अधिकृत राजेश कुमार झा सहितले कार्यक्रमको बारेमा मन्तब्य ब्यक्त गर्नुभएको थियो ।
