मोरङ । लेटाङमा जारी दोस्रो मेयर कप फुटबल प्रतियोगिता अन्तरगत सोमबार भएको खेलमा विजयी हुँदै वडा नम्बर ३ फाइनलमा पुगेको छ । लेटाङ ३ को घरेलु मैदान कमलपुरमा भएको पहिलो सेमीफाइनल खेलमा वडा नम्बर ६ लाई ४–१ ले पराजित गर्दै वडा नं ३ ले फाइनलमा स्थान बनाएको हो ।
निकै प्रतिस्पर्धात्मक खेलमा पहिलो गोल भने वडा नं ६ का जर्सी नं १७ का एलान तामाङले गर्दै आफ्नो टिमलाई सुरुवाती अग्रता दिलाएका थिए । तर वडा नम्बर ३ ले वडा नम्बर ६ को अग्रता धेरै बेर टीक्न दिएन । केही मिनेटमै वडा नं ३ का जर्सी नं १२ का सुमन लिम्बुले गोल गर्दै खेललाई बराबरीमा ल्याए । पहिलो हाफ १–१ गोलको बराबरीमा सकिए पनि दोस्रो हाफमा भने वडा नं ३ ले खेल आफ्नो पक्षमा पार्यो । दोस्रो हाफमा वडा नं ३ को तर्फबाट जर्सी नं १३ का अभिशेक लिम्बू, जर्सी नं ११ का सागर वि.क. र जर्सी नं ७ का आशिष माझीले १–१ गोल गरी समग्रमा वडा नम्बर ३ लाई ४-१ को जित दिलाए । खेलको म्यान अफ दी म्याच वडा नं ३ का जर्सी नं १३ का अभिशेक लिम्बू घोषित भए ।
घरेलु मैदानमा मेयर कप खेल्ने अवसर पाएको वडा नम्बर ३ लाई उपाधि दाबेदारको रुपमा समेत लिने गरिएको छ । भोली बुधबार दोस्रो सेमिफाइनल खेल वडा नं २ र वडा नं ४ बिच हुने छ । बुधबार हुने दोश्रो सेफीफाइनलको विजेता टीमले असार २२ गते शुक्रबार हुने फाइनल खेलमा वडा नम्बर ३ को सामना गर्नुपर्नेछ ।
प्रतियोगिताबाट छनौट भएका खेलाडीहरुलाई समेटेर नगर स्तरीय फुटबल टीम तयार गर्ने योजना रहेको नगर खेलकुद विकास समितिका सदस्य सचिव कृष्णराज राईले जानकारी दिनुभयो । प्रतियोगितामा उपाधि विजेता टीमले नगद १ लाख ३५ हजार र उपविजेता टीमले ६५ हजार पुरस्कारसहित ट्रफि पाउने छन् ।
