राजविराज । सप्तरीको महादेवा गाउँपालिका १ स्थित चिम्टीमा मंगलबार भीषण आगलागी हुँदा २ सयभन्दा बढी घर जलेर नष्ट भएका छन ।
दिउँसो २ बजेदेखि सुरु भएको आगलागीमा १ करोडभन्दा बढीको क्षति भएको प्रारम्भिक अनुमान गरिएको छ ।
तीब्र गतिको हुरीमा आगलागी भएको हुँदा ठूलो क्षति भएको जिल्ला प्रहरी कार्यालय सप्तरीले जनाएको छ । स्थानीय शत्रुधन यादवको घरबाट शुरु भएको आगलागीले गाउँ नै स्वाहा भएको स्थानीयले जनाएका छन । दलित र मुस्लिम समुदायको घना बसोबास रहेको बस्तीमा एक्कासि आगलागी हुँदा २ सय जति घर जलेर नष्ट भएको स्थानीयले जानकारी दिएका छन् ।
राजविराज, शम्भुनाथ, हनुमाननगर कंकालिनी नगरपालिकाबाट आएको बारुण यन्त्रको सहयोगमा प्रहरी र स्थानीयले आगो नियन्त्रणमा लिने प्रयास गरिरहेको वडा अध्यक्ष जयकिशोर दासले जानकारी दिए । उनका अनुसार साँझ ६ बजेसम्म पनि आगो पूर्ण नियन्त्रणमा आएको छैन ।
आगलागीको क्षति बारे विवरण संकलन भइरहेकोले कतिसम्म क्षति भएको भन्ने सम्बन्धमा अझै यकिन नभएको प्रहरीले जनाएको छ ।