राजविराज । शुक्रबार दिउँसो राजविराजस्थित औषधि पसलको अनुगमन गर्ने क्रममा पसलेहरूको भागाभाग भएको छ ।
जिल्ला प्रशासन कार्यालय सप्तरीको अगुवाइमा, जिल्ला जनस्वास्थ्य कार्यालय, कर कार्यालय, घरेलु कार्यालय, उपभोक्ता हित संरक्षण मञ्च,उ द्योग वाणिज्य संघ , सुरक्षा निकाय लगायतको संयुक्त अनुगमन टोलीले सदरमुकाम राजविराज स्थित औषधी पसलहरूको अनुगमन गरेको थियो ।
अनुगमन टोली आउने जानकारी पाए लगतै धेरै औषधि पसलेहरू पसल बन्द गरेर भागेका थिए ।
अनुगमन टोलीका एक सदस्यको अनुसार बिल बिजक, प्रतिबन्धित औषधि बेचविखन भएरनभएको, सरसफाइ, डेट एक्सपायर, भण्डारण लगायतका विषयमा औषध पसलको अनुगमन गर्न टोली निस्किएको थियो ।
धेरैले औषधि पसलेले बन्द गरे पनि पनि राजविराज ७ स्थित रूपेश राज फार्मेसी, साइमेडिको इन्टरप्राइजेज, राजविराज ३ स्थित एस औषधी पसल, आर एस ड्रग्स डिस्ट्रिव्युटर्स, वडा नम्बर ४ स्थित राजविराज फार्मेसी, सुशान्त प्याथोलोजी, मारुती मेडिकल, गजेन्द्र नारायण सिंह अस्पतालको फार्मेसी, छिन्नमस्ता अस्पताल, राजविराज ६ स्थित जनता डिस्पेन्सेरीको अनुगमन गरिएको छ ।
अनुगमनका क्रममा बिल बिजक नकाटेको र सरसफाइ नगरेको भन्दै केही पसललाई रु ५ हजारदेखि १० हजारसम्म जरिवाना गरिएको प्रमुख जिल्ला अधिकारी किरण थापाले जानकारी दिए ।
अनुगमन टोलीका एक सदस्यका अनुसार फार्मेसीको अनुमति लिएर भित्र ल्याब चलाइरहेको सूचना समेत आएको छ । ती पसलहरूको अब गोप्य तरिकाले अनुगमन गरी कारवाही गर्ने तयारी अनुगमन समितिको छ ।
