लेटाङ । अखिल नेपाल महिला संघ (अनेमसंघ) लेटाङ नगर कमिटीले आज सरसफाई कार्यक्रम गरेको छ । लेटाङ नगरपालिका वडा नम्बर ३ स्थित चिसाङ खोला नजिकैको मदन भण्डारी राजमार्ग आसपासको क्षेत्रमा सरसफाई कार्यक्रम गरिएको हो ।
संगठनको सर्कुलर अनुशार फोहरमैला व्यवस्थापन तथा सरसफाई अभियान अन्तरगत लेटाङमा पनि सरसफाई कार्यक्रम गरिएको नगर कमिटी सचिव तारा निरौलाले जानकारी दिनुभयो । खासगरि चिसाङ खोलास्थित शवदाहस्थल आसपासको क्षेत्रमा फोहरमैला बढ्दै गइरहेको अवस्थामा संगठनको सर्कुलर अनुसार सरसफाई कार्यक्रम गरिएको अनेमसंघ लेटाङ नगर कमिटी अध्यक्ष मनकुमारी राईले जानकारी दिनुभयो ।
कार्यक्रममा अनेमसंघ कोशी प्रदेश सदस्य तथा लेटाङ नगरपालिका उपप्रमुख कृष्णकुमारी निरौला र वडा नं. ३ का वडाध्यक्ष डम्बर राईको समेत सहभागिता रहेको थियो ।
उपप्रमुख निरौलाले फोहरलाई नदी वा खोलामा बगाउने तथा जलाउने नगरी त्यसको उचित व्यवस्थापन गर्नुपर्ने चेतना अभिवृद्धि गर्न आवश्यक रहेको बताउनुभयो । उहाँले आफ्नो गाउँ शहर र वरपरका क्षेत्रलाई सँधै सफा राख्नुपर्छ भन्ने सन्देहसहित कार्यक्रम गरिएको पनि बताउनुभयो ।
कार्यक्रममा नेकपा एमाले, अखिल नेपाल महिला संघ र राष्ट्रिय युवा संघ लेटाङका नेता तथा कार्यकर्ताहरुको सहभागिता रहेको थियो ।
