राजविराज । नेपाल पत्रकार महासङ्घ सप्तरीले समाचार लेखेकै कारण सप्तरीका पत्रकार नवीन कुमार गुप्तालाई ज्यान मार्ने धम्की दिने माथि कडा कारबाहीको लागी नेपाल पत्रकार महासङ्घ, सप्तरीले माग गरेको छ । महासङ्घद्वारा मङ्गलबार एक प्रेस विज्ञप्ति जारी गर्दै जिल्ला कोषाध्यक्ष समेत रहेका पत्रकार गुप्तालाई ज्यान मार्ने धम्की दिने माथि कडा कारबाहीको माग गरिएको हो ।
पत्रकार गुप्ताले “महदेवामा कामै नगरी करोडौँको भुक्तानी” शीर्षकमा राजविराजबाट प्रकाशित हुने राजविराज दैनिकका साउन ११ गते अनियमितता सम्बन्धी समाचार लेखेका थिए । आफ्नो नाम पत्रिकामा किन छापेको भन्दै सोमबार राती ९ बजेतिर ९८१५७७६६८८ नम्बरको मोबाइलबाट अभिषेक मण्डलले गालीगलौज सहित आफूलाई ज्यान मार्ने धम्की दिएको पत्रकार गुप्ताले बताए ।
मङ्गलबार शाखा सभापति श्रवणकुमार देव, सचिव रामनारायण विश्वास, सहसचिव गोपालप्रसाद गुप्ता, सदस्यद्वय विद्यानन्द राम र कृष्णकुमार मण्डलसहितको टोली जिल्ला प्रहरी कार्यालय पुगेर पत्रकार धम्क्याउने मण्डललाई अविलम्ब पक्राउ र कारवाहीको माग गर्दै निवेदन दिएको छ ।
नेपाल पत्रकार महासङ्घ, सप्तरीले जारी गरेको प्रेस विज्ञप्तिमा पत्रकार गुप्तालाई दिएको ज्यान मार्ने धम्की प्रति गम्भीर ध्यानाकर्षण भएको जनाएको छ । समाचारमा चित्त नबुझे खण्डन गर्ने प्रक्रिया हुँदाहुँदै ज्यान मार्ने धम्की दिनु गलत भएको जारी प्रेस विज्ञप्तिमा उल्लेख छ ।
धम्की दिने मण्डललाई कानुन अनुसार कारबाही गर्न सम्बन्धित निकायसँग माग गर्दै कारबाही नगरिए आन्दोलनमा उत्रिने महासङ्घका अध्यक्ष श्रवणकुमार देव र सचिव रामनारायण विश्वासले जारी गरेको विज्ञप्तिमा चेतावनी समेत दिइएको छ ।
यसैगरी नेपाल प्रेस युनियन सप्तरीले समेत पत्रकार गुप्तालाई धम्की दिने माथि कडा कारबाहीको माग गरेको छ । जिल्ला सह सचिव परिष कर्णले मङ्गलबार एक प्रेस विज्ञप्ति जारी गर्दै पत्रकार गुप्ता माथि दिइएको धम्की प्रति गम्भीर ध्यानाकर्षण भएको जनाएका छन् ।
