-तिलक राई
लेटाङ । लेटाङ नगरपालिका वडा नम्बर १ मा रहेका सामुदायिक विद्यालयका व्यवस्थापन समिति, शिक्षक अभिभावक संघ र शिक्षकहरुका लागि शुक्रवारदेखि २ दिने तालिम सुरु भएको छ । ग्रामिण भेगमा शैक्षिक गुणस्तरीयता वृद्धि गर्ने हाम्रो अभियान भन्ने मुल नाराका साथ गुणस्तरीय शिक्षा प्रदान तथा बालमैत्री नमूना विद्यालय निर्माण गर्नका लागि बालमैत्री शिक्षण विधि र बाल संरक्षण नीति सम्बन्धि तालिम सञ्चालन गरिएको हो ।
तालिमको उद्घाटन गर्दै लेटाङ १ का वडाध्यक्ष विष्णु कुमार मगरले शैक्षिक गुणस्तर वृद्धि गर्नका लागि शिक्षक सबै भन्दा जिम्मेवार हुने भन्दै शिक्षकको क्षमता विकास गर्नुपर्नेमा जोड दिनुभयो । उहाँले तालिमबाट प्राप्त ज्ञान, सीप व्यवहारमा प्रयोग गर्नुपर्ने बताउँदै सामुदायिक विद्यालयको शैक्षिक गुणस्तर सुधार गर्नु स्थानीय सरकारको प्रमुख लक्ष्य रहेको पनि बताउनुभयो ।
यस्तै पहाडी ग्रामीण विकास संस्था उत्तरी मोरङ हडनका कार्यक्रम संयोजक सुरेश अधिकारिले बालमैत्री विद्यालय निर्माण गर्न नीति बनाउन सहयोग पुग्ने भएकाले तालिमबाट सिकेका ज्ञान, सीप आफ्नो पेशागत जीवनमा र संस्थाको विकासमा लगाउनुपर्ने बताउनु भयो ।
पहाडी ग्रामीण विकास संस्था हर्डनको आयोजना, मेनोनाइट सेन्ट्रल कमिटी नेपाल र लेटाङ नगरपालिका वडा नम्बर १ को सहयोगमा आयोजना गरिएको तालिमको पहिलो दिन विद्यालयका सबल पक्ष, सुधार गर्नुपर्ने पक्ष, विद्यालयका चुनौती र अवसरका बारेमा समूहगत छलफल गरिएको थियो ।
विद्यालय व्यवस्थापन समिति संघका केन्द्रीय सदस्य बेदनीधि ढकालले सहजिकरण गर्न‘ भएको तालिममा लेटाङ नगरपालिका वडा नम्बर १ भित्र रहेका सामुदायिक विद्यालयका विद्यालय व्यवस्थापन समिति, शिक्षक अभिभावक संघ, प्रधानाध्यापक, शिक्षक, कर्मचारी, सहयोगी कर्मचारी लगायतको सहभागिता रहेको छ ।
