जनकपुरधाम । जनकपुरमा पत्रकारमाथि भएको आक्रमणको विरोधमा शनिबार पत्रकारहरूले जिल्ला प्रशासन कार्यालय धनुषा अगाडि धर्ना दिएका छन्। नेपाल पत्रकार महासंघ धनुषा शाखाको नेतृत्वमा बिहान ११ बजेदेखि सुरु भएको धर्नामा पत्रकारहरूले ‘आक्रमणकारीलाई कारबाही गर’ र ‘प्रेस स्वतन्त्रताको रक्षा गर’ भन्ने माग राखेका थिए।
गत साउन २७ गते गुठी संस्थानको जग्गा संरक्षण गर्ने क्रममा वकिलहरूको समूहले पत्रकारमाथि आक्रमण गरेको थियो। सो घटनामा महासंघका प्रदेश अध्यक्षसहित पाँच जना पत्रकार घाइते भएका थिए। आक्रमणमा संलग्न वकिलविरुद्ध जाहेरी दिइए पनि अहिलेसम्म पक्राउ नपरेको भन्दै पत्रकारहरू आन्दोलित बनेका हुन्।
