कञ्चनरूप। नेपालीहरूको महान् पर्व बडादसैँ आजदेखि विधिवत् रूपमा सुरु भएको छ। नवरात्रको पहिलो दिन आज देशभरका हिन्दू धर्मावलम्बीले घरघरमा घटस्थापना गरी जमरा राख्नुका साथै नवदुर्गाको पहिलो स्वरूप माता शैलपुत्रीको पूजाआराधना गरिरहेका छन्।
बडादसैँको पहिलो दिन घरको पूजाकोठा वा दसैँघरमा विधिपूर्वक कलश स्थापना गरी जौ, मकै, गहुँलगायतका अन्नका बीउ छर्ने परम्परा छ। घटस्थापनासँगै सुरु हुने नवरात्रमा नौ दिनसम्म नवदुर्गाका नौ स्वरूपको पूजा तथा उपासना गरिन्छ।
धार्मिक ग्रन्थअनुसार माता शैलपुत्री गिरिराज हिमालयकी पुत्री पार्वती हुन्। देवीकवच र मार्कण्डेय पुराणलगायतका ग्रन्थमा उनको महिमा उल्लेख गरिएको छ। शैलपुत्रीको पूजाआराधना गर्नाले सुख, शान्ति र समृद्धि प्राप्त हुने धार्मिक विश्वास छ।
धार्मिक आस्था र सांस्कृतिक परम्परासँग जोडिएको दसैँले पारिवारिक मिलन, आपसी सद्भाव र आत्मीयताको सन्देशसमेत बोकेको छ। घटस्थापनाबाट सुरु भएको पर्वको मुख्य दिन विजयादशमीमा मान्यजनबाट टीका, जमरा र आशीर्वाद ग्रहण गर्ने परम्परा छ।
घटस्थापनासँगै बडादसैँ सुरु, घरघरमा जमरा राखेर शैलपुत्रीको पूजा
२५ अशोज २०८३, आइतबार
