सप्तरीमा ५६ किलो लागुऔषध गाँजा बरामद

कञ्चनरूप । सप्तरीमा प्रहरीले ५६ किलो लागुऔषध गाँजा बरामद गरेको छ। जिल्ला प्रहरी कार्यालय सप्तरीका अनुसार लागुऔषध नियन्त्रण अभियानअन्तर्गत प्रहरीले गाँजा बरामद गरेको हो।
प्रहरीले असोज १९ गते राति करिब १ः३० बजे सप्तरीको सुरुङ्गा नगरपालिका–४ स्थित बलान खोलाको पुलभन्दा दक्षिणतर्फ बलान खोलाको किनारमा गाँजा बरामद गरेको जिल्ला प्रहरी कार्यालय सप्तरीले जनाएको छ।
प्रहरी चौकी मौवाहा र प्रहरी चौकी धातीबाट खटिएको संयुक्त प्रहरी टोलीले उत्तरबाट दक्षिणतर्फ जाँदै गरेका केही व्यक्तिले टाउकोमा गाँजा बोकेर ल्याइरहेको अवस्थामा देखेको थियो। प्रहरी टोलीलाई देखेपछि उनीहरूले गाँजा सोही स्थानमा फालेर भागेको प्रहरीको भनाइ छ।
प्रहरीका अनुसार गाँजा फालेर भागेपछि घटनास्थलमा खानतलासी गर्दा कालो कपडाले बाँधिएका प्लास्टिकका तीनवटा बोरा र प्लास्टिकका १७ वटा पोकामा राखिएको गाँजा फेला परेको थियो। बरामद गाँजा डिजिटल तराजुमा तौल गर्दा कुल ५६ किलो भएको प्रहरीले जनाएको छ।
बरामद लागुऔषध गाँजा आवश्यक कानुनी प्रक्रिया पूरा गरी इलाका प्रहरी कार्यालय कडरबोनामा राखिएको छ। घटनाबारे थप अनुसन्धान भइरहेको जिल्ला प्रहरी कार्यालय सप्तरीका प्रहरी नायब उपरीक्षक तथा सूचना अधिकारी हेमराज घिमिरेले जानकारी दिएका छन्।
लागुऔषधको अवैध ओसारपसार तथा कारोबार नियन्त्रणका लागि प्रहरीले निगरानी र अभियानलाई निरन्तरता दिइरहेको जनाएको छ।