कञ्चनरूप । कानुनी साक्षरताका लागि न्यायाधीश र विद्यार्थीबीच अन्तर्क्रिया कार्यक्रम आज यहाँ सम्पन्न भएको छ।
सप्तरीको रूपनगरस्थित नन्दराज संग्रौला क्याम्पसमा आयोजित कार्यक्रममा सप्तरी जिल्ला अदालतका मुख्य न्यायाधीश किशोर घिमिरेले अदालतको कार्यप्रणाली, विपन्न नागरिकलाई उपलब्ध हुने निःशुल्क न्याय सेवा लगायतका विषयमा जानकारी दिनुभयो।
त्यसैगरी, अदालतका श्रेस्तेदार श्यामहरि अधिकारीले अदालतबाट प्रदान गरिने न्याय, त्यसका प्रक्रिया, विभिन्न निकाय तथा संस्थाको भूमिका र नागरिकको दायित्व सम्बन्धी विषयमा कार्यपत्र प्रस्तुत गर्नुभयो।
कार्यक्रममा सप्तरी जिल्ला अदालतका न्यायाधीशहरू मोहनबहादुर अधिकारी, दीपक धिताल, बाबुराम भट्टराई, गोकुल पन्त र महेन्द्रप्रसाद पौडेलको समेत उपस्थिति रहेको थियो।
अन्तर्क्रियाका क्रममा विद्यार्थी, अभिभावक तथा अन्य सहभागीहरूले अदालती प्रक्रिया, न्याय सम्पादनमा हुने ढिलाइ, नागरिकले भोग्नुपरेका समस्या तथा युवा वर्गको भूमिकाबारे न्यायाधीशहरूलाई प्रश्न गरेका थिए। मुख्य न्यायाधीश घिमिरेले ती प्रश्नहरूको जवाफ दिनुभएको थियो।
रूपनगर नन्दराज संग्रौला क्याम्पसका विद्यार्थी, अभिभावक, शिक्षक, अधिवक्ता, राजनीतिज्ञ, समाजसेवी तथा पत्रकारहरूको उल्लेखनीय उपस्थिति रहेको कार्यक्रमको सञ्चालन नरबहादुर खड्काले गर्नुभएको थियो।
समाचार स्रोत : रूपनगर क्याम्पस फिचर सेवा।
