तेह्रथुम । पुष्पलाल मध्यपहाडी लोकमार्गमा जारी नेकपा एमालेको सम्बृद्धि यात्राका क्रममा भोली मंसिर २८ गते तेह्रथुमको बसन्तपुरमा हुने कार्यक्रमको सम्पूर्ण तयारी पूरा भएको छ । एमाले कोशी प्रदेश प्रचार तथा प्रकाशन विभाग प्रमुख लक्ष्मण तिवारीका अनुसार बसन्तपुरमा १५ हजार बढीको सहभागिता हुने गरि तयारी गरिएको छ ।
एमाले अध्यक्ष केपी शर्मा ओलीले सम्बोधन गर्नुहुने सभामा सुनसरी, मोरङ, तेहथुम, धनकुटा र संखुवासभाबाट सहभागिता रहनेछ । सुनसरी मोरङबाट मात्र ६० वटा वस, ६० वटा कारजीप र ३ सय बढी मोटरसाइकलमा सहभागि हुने नेता तिवारीले बताउनुभयो । आजैदेखि सहभागिहरु बसन्तपुर जान थालेका छन् । भोली दिउँसो साढे १२ बजे बसन्तपुरमा सभा सुरु हुने छ ।
बसन्तपुरमा एमाले अध्यक्ष केपी शर्मा ओलीलाई लिम्वू सँस्कृति अनुसार स्वागत गरिने छ । बसन्तपुर बजारमा हुने आमसभामा ५ सय १ जना स्वयम्सेवक खटिने छन् । सभाअघि बिभिन्न जातजाती भाषाभाषीको झाँकी सहित जुलुस निकालिने कार्यक्रम मुल आयोजक समितिका सहसंयोजक समेत रहेका नेता तिवारीले जानकारी दिनुभयो ।
आमसभाअघि चोलुङ्गपार्क र त्यहाँ स्थित ऐतिहासिक संग्राहलय नीरिक्षणको कार्यक्रम छ । बसन्तपुर मध्यपहाडी लोकमार्गमा पर्ने शहर हो । लोकमार्गमा रहेका १० शहरमा संचालित नयाँ शहर आयोजना बसन्तपुरमा पनि संचालित छ । बसन्तपुर गुराँसको राजधानी तीनजुरे मिल्के जलजलेको प्रवेशद्वार पनि हो ।
