पातो । सप्तरीको पातो क्षेत्रमा लागुऔषध दुर्व्यसन तथा सीमावर्ती क्षेत्रमा हुने अवैध ओसारपसार नियन्त्रण गर्ने उद्देश्यले हटैलमा सचेतनामूलक कार्यक्रम सम्पन्न गरिएको छ।
सशस्त्र प्रहरी बल, नेपाल सीमा सुरक्षा गुल्म हेडक्वार्टर पातो सप्तरीको आयोजनामा सम्पन्न कार्यक्रममा स्थानीय जनप्रतिनिधि, बुद्धिजीवी, समाजसेवी, पत्रकार तथा सर्वसाधारणको उल्लेखनीय सहभागिता रहेको थियो।
कार्यक्रममा तरहीमाका वडा अध्यक्ष भागेश्वर यादवले लागुऔषधले समाज र युवापुस्तामा पार्ने नकारात्मक असरबारे चर्चा गर्दै यसको नियन्त्रणका लागि सबै पक्ष एकजुट हुनुपर्ने आवश्यकता औंल्याए।
सशस्त्र प्रहरी बलका प्रमुख लक्ष्मण पन्थीले खुला सीमाबाट नेपाल भित्रिन सक्ने लागुऔषध तथा अपरिचित गैरनागरिक व्यक्तिको निगरानीलाई थप प्रभावकारी बनाउन होटल तथा आवास क्षेत्रमा अनिवार्य रूपमा रजिस्टर कायम राख्न निर्देशन दिइएको जानकारी दिए।
उनले लागुऔषध नियन्त्रण ऐन २०३३ अनुसार लागुऔषध उत्पादन, ओसारपसार, बिक्री–वितरण, सेवन तथा भण्डारण गर्नेलाई कैद तथा जरिवानासहित कडा कानुनी कारबाही हुने स्पष्ट पारे। कार्यक्रममा गाँजा, चरेस, अफिम, हेरोइन, कोकिन, ब्राउन सुगर, कोरेक्सलगायत विभिन्न लागुऔषधका प्रकार र त्यसबाट हुने सामाजिक, आर्थिक तथा स्वास्थ्यजन्य क्षतिबारे विस्तृत जानकारी प्रदान गरिएको थियो।
कार्यक्रममा सहभागीहरूले सीमावर्ती क्षेत्रमा बढ्दो लागुऔषध चुनौती नियन्त्रण गर्न स्थानीय तह, सुरक्षा निकाय र नागरिकबीच सहकार्य आवश्यक रहेको बताएका थिए।
