कञ्चनरूप । जिल्ला प्रशासन कार्यालय सप्तरीले सरकारी कार्यालय परिसरमा अनधिकृत रूपमा सक्रिय ‘बिचौलिया’माथि कडाइ गर्ने निर्णय गरेको छ। सेवाग्राहीलाई सहयोग तथा सहजीकरण गर्ने बहानामा गैरकानुनी रूपमा रकम असुल्ने कार्य बढ्न थालेपछि प्रशासनले यस्तो गतिविधि पूर्ण रूपमा निषेध गरेको हो।
शुक्रबार सहायक प्रमुख जिल्ला अधिकारी नरेश कुमार यादवद्वारा जारी सूचनामा कार्यालय वरिपरि तथा भित्र प्रवेश गरी सेवाग्राहीलाई प्रभावमा पार्ने, फकाउने वा सहजीकरणको नाममा रकम लिने व्यक्तिहरूलाई अबदेखि कडा निगरानीमा राखिने उल्लेख गरिएको छ।
प्रशासनले यस्ता गतिविधिमा संलग्न व्यक्ति कार्यालय परिसर वा आसपास फेला परेमा प्रचलित कानुनबमोजिम तत्काल नियन्त्रणमा लिएर कारबाही गरिने स्पष्ट चेतावनी दिएको छ।
सरकारी सेवा लिन आउने सर्वसाधारणलाई कुनै पनि कामका लागि बिचौलियाको भर नपरी सम्बन्धित शाखा तथा कर्मचारीसँग प्रत्यक्ष सम्पर्क गर्न प्रशासनले आग्रह गरेको छ। पछिल्लो समय सरकारी कार्यालयहरूमा सेवाग्राहीलाई झुक्याएर रकम असुल्ने गुनासो बढ्दै गएपछि सप्तरी प्रशासनले यो कदम चालेको बताइएको छ।
यो निर्णयसँगै सरकारी सेवा प्रवाहलाई थप पारदर्शी, छिटो र सेवामैत्री बनाउने प्रशासनको तयारी देखिएको छ। स्थानीयवासीले पनि प्रशासनको यो कदमलाई सकारात्मक रूपमा लिँदै बिचौलिया प्रवृत्ति अन्त्य गर्न प्रभावकारी कार्यान्वयनको माग गरेका छन्।
