लेटाङ । लेटाङ नगरपालिका वडा नम्बर ९ स्थित वैजनाथ अधिकारी प्रारम्भिक संस्कृत विद्यापीठको व्यवस्थापन समितिको अध्यक्षमा स्थानीय समाजसेवी सोमनाथ निरौला चयन हुनु भएको छ । भर्खरै चयन गरिएका ७ जना सदस्यहरु मध्ये जेष्ठ सदस्य गोपाल मगरको अध्यक्षतमा बसेको बैठकले सर्वसहमतिमा निरौलालाई अध्यक्ष चयन गरेको हो ।
निरौला गत बैशाखमा विद्यापीठको सहयोगार्थ सञ्चालन गरिएको श्रीमद् भागवत महायज्ञको आयोजक समिति अध्यक्ष तथा तत्कालिन जाँते गाविस वडा नम्बर ९ को वडाध्यक्ष समेत हुनुहुन्थ्यो । गत कार्त्तीक १७ गते भएको अभिभावकहरुको भेलाले ४ जना सञ्चालन समिति सदस्य चयन गरेकोमा वडाबाट १ जना र नगरपालिकाबाट २ जना सदस्य चयन गरि पठाएपछि बसेको बैठकले निरौलालाई अध्यक्ष चयन गरेको हो ।
व्यवस्थापन समिति सदस्यहरुमा लेटाङ ९ का वडासदस्य समेत रहनु भएका गोपाल मगर तथा लेटाङ ८ की हरिमाया घिमिरे, मिक्लाजुङका उमेश निरौला, लेटाङ ५ की इन्दिरा पौडेल, लेटाङ ९ का टेकनाथ निरौला, रतुवामाईकी शोभा भट्टराई गौतम र शिक्षक प्रतिनिधिबाट उज्ज्वल ढुंगाना रहनु भएको छ । यसैगरि सदस्यसचिव विद्यालयका प्रधानाध्यापक रहने व्यवस्था अनुसार एकराज भट्टराई चयन हुनुभयो ।
पूर्व राजपरिषद् सदस्य समेत रहनु भएका पूर्वीय दर्शनका ज्ञाता आचार्य श्री खेमराज केशवशरणले कथाबाचन गरेर २०६६ सालमा महायज्ञ लगाइ सहयोग जुटाएर २०६८ सालमा विद्यापीठ स्थापना गरिएको थियो । विद्यापीठ स्थानीयस्तरबाट सञ्चालित उत्तरी मोरङकै एकमात्र संस्कृत विद्यापीठ हो । यहाँ हाल ३१ जना बटुक विद्यार्थी अध्ययनरत छन् ।
