लेटाङ । राष्ट्रिय युवा संघ मोरङले लेटाङ ६ का एक विपन्न परिवारका बालबालिकाहरुलाई खाद्यान्न लगायतका सामाग्री प्रदान गरेको छ । लेटाङ ६ सालवारी टोलका ३ जना बालबालिकाको अवस्थाको बारेमा मोरङ खबरमा प्रशारण भएको भिडियो सामाग्री हेरेपछि राष्ट्रिय युवा संघ मोरङले तत्कालका लागि आवश्यक सहयोग उपलब्ध गराएको हो ।
आमाले छाडेर गएको तथा बाबु पनि कमाउन भारत गएपछि ३ जना बालबालिका साहारबिहिन भएको भिडियो सामाग्री हेरेपछि तत्काल केही सहयोग गर्नुपर्छ भन्ने सोचेर उनीहरुको घरमै पुगेर खाद्यान्न सामाग्री प्रदान गरिएको राष्ट्रिय युवा संघ मोरङका अध्यक्ष प्रविण घिमिरेले जानकारी दिनुभयो । बालबालिकाहरुको घरको अवस्था दयनीय रहेको देखेपछि अन्य व्यवस्थापन भन्दा पनि तत्काल खाद्यान्न आवश्यक देखेर सहयोग गरेको उहाँको भनाइ छ ।
उनीहरुको घरको वस्तुस्थिति बुझ्ने तथा थप के सहयोग आवश्यक छ भन्ने अध्ययन गर्ने उद्देश्यले पहिलो चरणको सहयोग उपलब्ध गराएको राष्ट्रिय युवा संघ कोशी प्रदेश उपाध्यक्ष जयप्रकाश रायमाझीले जानकारी दिनुभयो । उहाँले पहिलो चरणमा २ बोरा चामल, आलु, दाल, सावन, प्याज, मसला, विस्कुट, भुजिया, मासु लगायतका सामग्री प्रदान गरिएको जानकारी दिनुभयो ।
सो अवसरमा बोल्दै स्थानीय समाजसेवी गोपाल नेपालीले राष्ट्रिय युवा संघले सहयोग गरेकोमा धन्यवाद दिंदै सो परिवारलाई आगामी दिनमा अन्य सामाग्रीको समेत सहयोग आवश्यक रहको बताउनभुयो । यस्तै नेकपा एमाले लेटाङ नगर कमिटी सचिव जीतबहादुर लामाले सो परिवारको अवस्था निकै दयनीय पाइएको भन्दै आगमी दिनमा आवास, शिक्षा, स्वास्थ्य जस्ता विषयमा सबैले सहयोग गर्नुपर्नेमा जोड दिनुभयो ।
सो परिवारमा बाबु, ४ जना छोरा र १ जना छोरी रहेको पाइएको छ । बाबु कमाउन भारत गएको, १६ वर्षीय जेठो छोरा र १३ वर्षीय माइलो छोराले विद्यालय छाडेर स्थानीय क्षेत्रमै मजदुरी गर्ने गरेको तथा ११ वर्षीया छोरी, ९ वर्षीय छोरा र ६ वर्षीय छोरा घरमै बस्ने गरेको स्थानीयले बताएका छन् । जसका कारण ३ जना साना बालबालिकाहरुको लालनपालन र शिक्षा दिक्षामा समस्या देखिएको छ ।
यसैबीच लेटाङ नगरपालिका प्रमुख भूपेन्द्र कुमार लावतीले पनि सो परिवारसँग भेट गरि नगरपालिकाले पानी, विजुलीको व्यवस्था गर्ने तथा शिक्षा दिक्षामा सहजिकरण गर्ने बताउनु भएको छ । मोरङ खबरमा बालबालिकाको विषयमा भिडियो सामाग्री प्रशारण हुनासाथ धेरैजना सहयोगीहरुले विभिन्न सहयोग गर्ने प्रतिवद्धता जनाएका छन् ।
