पातो । सप्तरीको डाक्नेश्वरी नगरपालिकाले पूर्ण खोप सुनिश्चितता तथा दिगोपना घोषणा गरेको छ।
नगरपालिकाको आयोजनामा सम्पन्न कार्यक्रममा नगर प्रमुख रामलखन मल्लाहको अध्यक्षता तथा पूर्व संविधानसभा सदस्य ताराकान्त चौधरीको प्रमुख आतिथ्यतामा पालिकालाई पूर्ण खोप सुनिश्चितता तथा दिगोपना घोषणा गरिएको हो।
कार्यक्रममा स्वास्थ्य संयोजक शिवशंकर ठाकुरले नगरपालिकाका १० वटै वडामा रहेका ० देखि ५९ महिनासम्मका सबै बालबालिकालाई पूर्ण खोप प्रदान गरिएको जानकारी दिए। स्वास्थ्यकर्मी, महिला सामुदायिक स्वास्थ्य स्वयंसेविका तथा सरोकारवाला निकायहरूको सक्रिय सहभागिता, मेहनत र समन्वयका कारण पूर्ण खोप सुनिश्चितता अभियान सफलतापूर्वक सम्पन्न भएको उनले बताए।
सो अवसरमा जिल्ला समन्वय समिति सप्तरीका प्रमुख शिवनारायण साह तथा स्वास्थ्य कार्यालय सप्तरीका प्रमुख डा. सतीशकुमार यादवले खोपले बालबालिकालाई विभिन्न सरुवा तथा घातक रोगबाट जोगाउने भएकाले यसको प्रभावकारिता र महत्वबारे प्रकाश पारे। उनीहरूले खोप कार्यक्रमलाई दिगो बनाउन अभिभावक, स्थानीय तह तथा स्वास्थ्यकर्मीबीच निरन्तर सहकार्य आवश्यक रहेको बताए।
कार्यक्रमका क्रममा पूर्ण खोप सुनिश्चितता अभियान सफल बनाउन उल्लेखनीय योगदान पुर्याउने स्वास्थ्यकर्मी, महिला सामुदायिक स्वास्थ्य स्वयंसेविका तथा अन्य सरोकारवालाहरूलाई प्रशंसापत्र र मायाको चिनो प्रदान गरी सम्मान गरिएको कार्यक्रम सञ्चालक महेश पण्डितले जानकारी दिए।
कार्यक्रममा जनप्रतिनिधि, विभिन्न राजनीतिक दलका प्रतिनिधि, स्वास्थ्यकर्मी, महिला सामुदायिक स्वास्थ्य स्वयंसेविका तथा स्थानीयवासीहरूको उल्लेखनीय सहभागिता रहेको थियो।
