रुपनगर चौकमा सडक विस्तारसँगै खानेपानी पाइप फुट्यो
एक हप्ता बितिसक्दा पनि मर्मत नहुँदा पानी खेर
ढल मिसिने जोखिम, सङ्क्रमणको खतरा
स्थानीयवासी आक्रोशित, निकाय मौन
कञ्चनरूप। कमला–कञ्चनपुर सडक विस्तारका क्रममा रुपनगर चौकमा रहेको खानेपानीको पाइप फुटेपछि स्थानीयवासीमा पानीजन्य रोग फैलिने जोखिम बढेको छ । पाइप फुटेको एक हप्ता बितिसक्दा पनि शहरी खानेपानी तथा सरसफाइ उपभोक्ता संस्थाले कुनै चासो नदेखाउँदा समस्या अझ गम्भीर बन्दै गएको हो ।
स्थानीयहरूका अनुसार फुटेको पाइपबाट लगातार पानी बगिरहेको छ । करिब एक इन्च व्यासको पाइप निरन्तर चुहिँदा ठूलो मात्रामा पानी खेर गइरहेको छ । सडक विस्तार सुरु हुनुअघि नै उक्त क्षेत्रबाट खानेपानी पाइपलाइन गए पनि पूर्वतयारी नगरी सडक निर्माण कार्य अघि बढाउँदा पाइप क्षति पुगेको हो ।
अब फुटेको पाइप नजिकै ढल पाइप विस्तार गरिएकोले ढल मिसिने सम्भावना थपिएको छ । सरोकारवालाहरूले चेतावनी दिएका छन् कि यसरी खानेपानी र ढलको पाइप समान क्षेत्रमा चल्दा उपभोक्ताको स्वास्थ्यमा गम्भीर असर पर्न सक्ने खतरा बढेको छ ।
स्थानीयवासीले पटक–पटक गुनासो गरे पनि सम्बन्धित निकाय मौन बसेको भन्दै आक्रोश व्यक्त गरेका छन् । उनीहरूको भनाइ छ — “एक हप्ता बितिसक्दा पनि पानी खेर जानु र निकायले नदेख्ने कुरा उपभोक्ता माथिको बेवास्ता हो।”
यता, खानेपानी संस्थाका जिम्मेवार अधिकारीहरूले भने यसबारे तत्काल जानकारी लिएर मर्मत कार्य सुरु गर्ने आश्वासन दिएका छन् । तर स्थानीयहरूले तत्काल समस्या समाधान नभए स्वास्थ्य सङ्कट उत्पन्न हुने चेतावनी दिएका छन् ।
