कञ्चनरूप । सप्तरीको सप्तकोशी नगरपालिका–५ गंगाजलीमा शनिबारदेखि दुईदिने आदिवासी जनजाति साहित्य महोत्सव–२०८३ आयोजना हुने भएको छ। कात्तिक १४ र १५ गते सञ्चालन हुने महोत्सवको सम्पूर्ण तयारी पूरा भएको आयोजकले जनाएको छ।
सप्तकोशी नगरपालिका–५ वडा कार्यालयको आयोजनामा हुन लागेको महोत्सवमा नेपालका विभिन्न जिल्ला तथा भारतका आदिवासी जनजाति अगुवा, साहित्यकार, अभियन्ता, कलाकार, पत्रकार र जनप्रतिनिधिहरूको सहभागिता रहनेछ।
महोत्सवमा आदिवासी जनजातिको भाषा, साहित्य, कला, संस्कृति, परम्परागत ज्ञान, सीप र मौलिक पहिचानको संरक्षणसँगै अधिकारका विषयमा छलफल तथा नीतिगत बहस गरिनेछ। संघीयता, आइएलओ महासन्धि–१६९, यूएनड्रिप, जलवायु परिवर्तन र आदिवासी अधिकारका विषयसमेत छलफलको मुख्य विषय रहने आयोजकले जनाएको छ।
महोत्सवको शनिबार बिहान ११ बजे मधेश प्रदेशका प्रदेश प्रमुख सुरेन्द्र लाभले उद्घाटन गर्ने कार्यक्रम छ। उद्घाटन समारोहमा मधेश प्रदेशका सभामुख रामअशिष यादव, आदिवासी जनजाति आयोगका अध्यक्ष रामबहादुर थापा मगर, नेपाल आदिवासी जनजाति महासंघका केन्द्रीय अध्यक्ष निमा लामा ह्योल्मोलगायत विशिष्ट व्यक्तित्वहरूको सहभागिता रहनेछ।
महोत्सवले आदिवासी जनजातिको भाषा, साहित्य र संस्कृतिको संरक्षण तथा पुस्तान्तरणका साथै उनीहरूका अधिकारका सवालमा राष्ट्रियस्तरमा बहस अघि बढाउने अपेक्षा गरिएको छ।
