- राजु गौतम
लेटाङ । नेपालले क्रिकेटमा अन्तर्राष्ट्रिय स्तरमा पाउँदै गरेको सफलतालाई जनस्तरसम्म पुर्याउने तथा क्रिकेटको विकासमा स्थानीय सरकारको चासो बढाउने उद्देश्यका साथ लेटाङमा क्रिकेट प्रतियोगिता हुने भएको छ । लेटाङका स्थानीय क्रिकेट प्रेमी युवाहरुले स्वतस्फूर्त आयोजना गरेको प्रतियोगिता मंसिर २ र ३ गते लेटाङ ५ स्थित प्रस्तावित बुद्ध रंगशालामा हुनेछ भने ४ वटा टीमले प्रस्पिर्धा गर्दैछन् ।
यसअघि खेलाडी दर्ता गरी फ्री अक्सन मार्फत खेलाडीहरूलाई ४ टिममा बाँडफाँड गरिएको प्रतियोगिता डाइरेक्टर सूर्य बिक्रम श्रेष्ठले जानकारी दिनुभयो । टीमहरूको नाम आकर्षक तथा रचनात्मक होस् र लेटाङका पर्यटकीय क्षेत्रहरुको समेत प्रवर्धन होस् भन्ने उद्देश्यले प्रतियोगितामा सहभागीता जनाउने टीमको नाममा लेटाङकै पर्यटकीय गन्तब्यहरूको नाम जोडिएको छ । जस अन्तरगत सञ्जीव भण्डारीको कप्तानीमा चिसाङ वारियर्स, सन्तोष लुइँटेलको कप्तानीमा राजारानी किंग्स्, द्रोण मगरको कप्तानीमा किसे नाइट राइडर्स तथा उत्तम ढकालको नेतृत्वमा समला राइनोज रहेका छन् ।
टी-ट्वान्टी प्रतियोगिता अन्तरगत मंसिर २ गते पहिलो खेलमा बिहान ७ : ४५ बाट चिसाङ वारियर्स र समला राइनोज तथा दोस्रो खेलमा दिउँसो १२ : ४५ मा राजारानी किंग्स र किसे नाइट राइडर्स बीच प्रतिस्पर्धा हुनेछ । विजेताहरूले मंसिर ३ गते बिहान ८ बजे फाइनल खेल्नेछन् । विजेताले नगद १५ हजार र उपविजेताले नगद ९ हजार ५ सय पाउने छन् । साथै उत्कृष्ट प्रदर्शन गर्ने खेलाडीहरूले व्यक्तिगत अवार्ड समेत प्राप्त गर्ने आयोजकले जनाएको छ ।
