सुनसरी । राष्ट्रिय युवा संघ नेपाल इटहरीले युवा प्रशिक्षण तथा अभिमुखिकरण कार्यक्रम सम्पन्न गरेको छ । संघको देशव्यापी अभियान मिशन नेक्स्ट इलेक्सन टार्गेट न्यु जनेरेशन अन्तरगत इटहरी उपमहानगर कमिटीले कार्यक्रम गरेको हो । राष्ट्रिय युवा संघबाट इटहरी उपमहानगरपालिकामा उत्प्रेरकको रुपमा खटिनु भएका सचिवालय सदस्य उपेन्द्र शाहीको प्रमुख आतिथ्यतामा भएको कार्यक्रममा संघका सुनसरी जिल्ला अध्यक्ष सुजन लामा र प्रदेश कमिटी सदस्य अरूण श्रेष्ठ लगायतको समेत आतिथ्यता रहेको थियो ।
कार्यक्रममालाई सम्बोधन गर्दै सचिवालय सदस्य शाहीले देशमा आमूल परिवर्तन गर्न युवाहरू जाग्न आवश्यक रहेको औंल्याउनु भयो । उहाँले अब युवाहरूले स्थापित पार्टीहरूभित्रै शुद्धीकरणको लागि लड्नुपर्ने र पार्टी बाहिर भने पार्टी विरूद्धका भ्रम चिर्न लागिपर्नु पर्ने बताउनुभयो । उहाँले अहिले स्थापित पार्टीहरूमा रहेका कमी कमजोरी सुधार्न युवाहरू लड्न आवश्यक रहेको बताउनुभयो । संगसंगै उहाँले पार्टी र नेताहरूविरूद्ध अनर्गल प्रचार हुने गरेको भन्दै त्यसका विरूद्ध पनि युवाहरू लाग्नुपर्ने भन्दै निर्देशन दिनुभयो । भविष्य युवाहरूको नै भएको उजागर गर्दै उहाँले आफ्नो योग्यता र क्षमतामा वृद्धि गर्दै युवाहरू हस्तक्षेपकारी भूमिकामा आउन आवश्यक रहेको उल्लेख गर्नुभयो । कार्यक्रमको अध्यक्षता संघका इटहरी उपमहानगरपालिका अध्यक्ष कमलजंग दाहालले गर्नु भएको थियो ।
