काठमाडौं । आन्दोलनरत शिक्षकहरु र सरकारबीच आज साँझ बसेको बैठक निष्कर्षविहीन बनेको छ । बिहीबार साँझ सिंहदरबारस्थित गृहमन्त्रालयमा बसेको बैठकमा कुनै सहमति नजुटेको हो । बैठकपछि सञ्चारकर्मीसँग कुरा गर्दै कानूमन्त्री धनराज गुरुङले भोलि मात्र टुंग्याइने जानकारी दिनुभयो ।
नेपाल शिक्षक महासंघले भने यो वार्ता नभएर अनौपचारिक छलफल भएको जनाएको छ । नेपाल राष्ट्रिय शिक्षक संघका अध्यक्ष विष्णुप्रसाद भण्डारीले अनिश्चितकालीन आन्दोलन जारी रहने जानकारी दिनुभयो । उहाँले सहमति नभइ आन्दोलन नछोड्ने र वार्ता कमिटी गठन गरेर मात्रै सहमति हुने बताउनुभयो ।
वार्ता कमिटी गठन भएर जबसम्म बैठक हुँदैन तबसम्म आफुहरुले छलफल र हस्ताक्षर नगर्ने उहाँको भनाइ छ । भोलि विहान ९ बजे पुनः बैठक बस्ने उहाँले जानकारी दिनुभयो ।
सिंहदरबारस्थित गृह मन्त्रालयमा भएको बेठकमा उपप्रधान तथा गृहमन्त्री नारायणकाजी श्रेष्ठ, शिक्षामन्त्री अशोक राई, कानूनमन्त्री धराज गुरुङ र सचिव सुरेश अधिकारीलगायत सहभागी हुनुहुन्थ्यो । यता आन्दोलनकारी शिक्षकहरूको तर्फबाट शिक्षक महासंघकी अध्यक्ष कमला तुलाधरसहित शिक्षक संघ, संगठनका प्रतिनिधिहरू वार्तामा उपस्थित थिए ।
शिक्षा विधेयकले अस्थायी प्रकृतिका शिक्षकहरूको स्थायित्व, विद्यालय कर्मचारीको दरबन्दी सिर्जना, विद्यालय संरचना बाहिर रहेका बाल कक्षा शिक्षकहरूको सवाल, अस्थायी अवधि गणना तथा निवृत्तिभरण, शिक्षक बढुवा, प्रधानाध्यापक नियुक्ति, सरूवा र कार्यसम्पादन मूल्यांकन लगायतका विषयमा सम्बोधन गर्न नसकेको भन्दै महासंघले हिजो बुधबारदेखि राजधानी केन्द्रीत आन्दोलन सुरु गरेको छ ।
