-राजु गौतम
लेटाङ, २-माघ । कमलपुर टोल टोल विकास संस्था लेटाङ ३ को आयोजनामा मंगलबार सम्पन्न रन कमलपुर २०८० को उपाधि पुरुषतर्फ मनोज राई र महिलातर्फ बिनिशा लिम्बूले जितेका छन् ।
प्रमुख अतिथि प्रतिनिधि सभाका पूर्वसदस्य माननीय घनश्याम खतिवडाले लेटाङ अस्पताल अगाडी दौडमा सहभागी प्रतिस्पर्धिहरूमाझ रिवन काटी दौड प्रतियोगिता उद्घाटन गर्नु भएको थियो । दौडको निर्धारित दुरी लेटाङ अस्पतालबाट प्रशान्त मेडिकल हल, मिलनचोक, गंगेचोक हुँदै कमलपुर मैदानसम्मको ५ किलोमिटर तय गरिएको थियो ।
पुरुषतर्फका विजेता मनोज निर्धारित दुरी १५ मिनेट ३९ सेकेण्डमा पार गर्दै च्याम्पियन बनेका हुन भने १६ मिनेट १० सेकेण्डमा दुरी पार गर्दै आशिष विक दोस्रो र १६ मिनेट ३२ सेकेण्डमा दुरी पार गर्दै प्रविन बराइली तेस्रो भए । त्यस्तै सुनिल श्रेष्ठ, रक्की मगर, लोकेन्द्र लिम्बू, जीवन गजमेज, युगेश राई, सरोज राई र कमल ओझाले क्रमशः चैथो देखि दशौं स्थान हासिल गरेका छन् ।
महिला तर्फकी बिनिशाले निर्धारित दुरी २१ मिनेट २ सेकेण्डमा पार गर्दै च्याम्पियन बनिन् । यस्तै २१ मिनेट ५० सेकेण्डमा दुरी पार गर्दै यानी लम्बू दोश्रो र २२ मिनेट ३८ सेकेण्डमा दुरी पार गर्दै कुन्ता थापा मगर तेस्रो भइन् । यस्तै प्रीया राई, सञ्जना मगर, सोलिना लिम्बू, अनुसा राई, सजिना राई, दीक्षा राई र अन्जु मगरले क्रमशः चैथो देखि दशौं स्थान हात पारेका छन् ।
महिला र पुरुष दुवैतर्फका विजेताहरूलाई प्रथम पुरस्कार ५ हजार, दोस्रो पुरस्कार ३ हजार, तेस्रो पुरस्कार २ हजार र चौथोदेखि दशौं स्थानसम्मका सहभागीलाई सान्त्वना पुरस्कार स्वरुप ५ सयका दरले पुरस्कार प्रदान गरिएको थियो । त्यस्तै बालप्रोत्साहन तथा जेष्ठ प्रोत्साहन स्वरुप ५ ५ सयका दरले रकम प्रदान गरिएको थियो ।
कार्यक्रमका प्रमुख अतिथी प्रतिनिधि सभाका पूर्व सदस्य माननीय घनश्याम खतिवडा, लेटाङ नगरपालिकाका नगर प्रमुख भुपेन्द्र कुमार लावती, नगर उपप्रमुख कृष्णकुमारी निरौला, वडा नं ३ का वडा अध्यक्ष डम्बर राई, वडा नं ४ का वडा अध्यक्ष रामकुमार श्रेष्ठ लगायतका अतिथिहरुले विजेता खेलाडीहरुलाई पुरस्कार प्रदान गर्नु भएको थियो ।
प्रतियोगितालाई आर्थिक सहयोग देश विदेशबाट प्राप्त भएको र प्रतियोगिताको खर्च कटाएर रहेको रकमबाट खुला व्यायामशाला निर्माण गरिने वडा नं ३ का वडाअध्यक्ष डम्बर राईले जानकारी दिनुभयो । प्रतियोगिताको आयोजक कमलपुर टोल विकास संस्था रहेकोमा सहयोगीहरू लेटाङ नगरपालिका, ३ नम्बर वडा कार्यालय, कमलपुर सामुदायिक वन र सनराईज युनाईटेड क्लब रहेकोमा मिडिया पार्टनर कमलपुर ग्यालरी र लेटाङ खबर रहेका थिए ।
