लेटाङ । लेटाङ नगरपालिकास्थित चिसाङ खोलामा निर्माण हुने भनिएको बहुप्रतिक्षित चिसाङ मुक्तिघाटको निर्माण कार्य तत्काल सुरु हुने भएको छ । मुक्तिघाट निर्माणका लागि लेटाङ नगरपालिकाले बजेट विनियोजन गरि ५५ लाखमा ठेक्का समेत दिइसकेकाले दशैं अघि नै निर्माण सुरु हुने भएको छ ।
आज मुक्तिघाट निर्माणस्थको अनुगमन गर्दै लेटाङ नगरपालिकाका प्रमुख भूपेन्द्र कुमार लावतीले ठेक्का बन्दोबस्तीको काम सम्पन्न भएकाले ठेकेदारलाई दाशैं अघि नै काम सुरु गर्न निर्देशन दिइएको जानकारी दिनुभयो । उहाँले चिसाङ खोलाको दुवैतर्फ शवदाहस्थल र मलामी घर निर्माण गरिने जानकारी दिनुभयो ।
आज नगरपालिकाका इञ्जिनियर भानुभक्त राई र निर्माण व्यवसायीलाई समेत साथै लिएर निर्माणस्थल अवलोकनका लागि पुग्नु भएका नगर प्रमुख लावतीले मुक्तिघाट निर्माणको विषयमा जग्गादाता तथा स्थानीयवासीलाई समेत जानकारी गराउनुभयो । ।
यता निर्माण व्यवसायी राममणि बरालले पनि दशैं अघि नै काम सुरु गर्ने प्रतिवद्धता जनाउनु भएको छ । चिसाङ खोलामा व्यवस्थीत शवदहस्थल र मलामी घर नहुँदा अन्त्येष्टिका लागि समस्या हुँदै आएको छ ।
