राजविराज । सप्तरीको महादेवा गाउँपालिका–१ मा गरिएको शिक्षक सरुवाले विद्यार्थी र अभिभावकको आक्रोश उर्लिएको छ। सरुवा तत्काल फिर्ता नगरे आन्दोलनमा उत्रिने चेतावनी अभिभावक, विद्यार्थी र स्थानीय समाजसेवीहरूले दिएका छन्।
नरबहादुर थापा जनता माध्यमिक विद्यालय पकरी गोठ सोनरामा सहितका विद्यालयमा कार्यरत दक्ष र अनुभवी शिक्षकहरूलाई मनपरी शैलीमा सारिएपछि पठनपाठन ठप्प भएको भन्दै आइतबार वडाध्यक्ष जयश्वर किशोर दास, बुद्धिजीवी, समाजसेवी र पूर्व वि।व्य।स। अध्यक्षहरूको उपस्थितिमा गरिएको छलफलले शिक्षक सरुवा फिर्ता गर्न माग गरेको हो।
छलफलले आधारभूत विद्यालयका शिक्षक नारायण यादव, रा.प्रा.वि।का शिक्षक दिलीप यादव र प्रा.वि. राहत शिक्षिका कामोर कुमारी यादवलाई तत्काल फिर्ता गर्नुपर्ने निष्कर्षसहितको पत्र गाउँपालिका अध्यक्षलाई बुझाएको छ।
“विद्यार्थीको भविष्यसँग खेलवाड गरियो भने हामी चुप लाग्दैनौँ, सडकमा उत्रेर सशक्त आन्दोलन गर्छौँ,” पूर्व वि।व्य।स। अध्यक्ष देवनारायण यादवले चेतावनी दिए।
यस्तै, राहत शिक्षकका रूपमा ११ वर्षदेखि गणित पढाउँदै आएका शम्भु यादवको सरुवा विरुद्ध कक्षा ८, ९ र १० का विद्यार्थीहरूले आइतबारदेखि नै कक्षाब बहिष्कार गरेका छन्। विद्यार्थीहरूले नारा लगाउँदै घोषणा गरेका छन्–
“हाम्रो शिक्षक फिर्ता गर, नत्र विद्यालय बन्द गर !”
स्थानीय अभिभावक महेन्द्र यादवले भने, “पढाइलाई बन्धक बनाउन दिँदैनौँ। शिक्षा हाम्रो हक हो, त्यो हक खोस्न खोजियो भने आन्दोलन अझै उग्र बनाउँछौँ।”
शिक्षक सरुवाको नाममा भएको मनपरी निर्णय तुरुन्त सच्याइएन भने महादेवा गाउँपालिका आन्दोलनको थलो बन्ने सङ्केत देखिएको छ।
