सप्तरीको फत्तेपुरमा रहेको नेपाल बैंक लिमिटेडका सुरक्षा गार्ड मृत फेला

फत्तेपुर । सप्तरीको सप्तकोशी नगरपालिका–१ फत्तेपुरमा रहेको नेपाल बैंक लिमिटेडका सुरक्षा गार्ड मृत फेला परेका छन् ।
सप्तरी प्रहरीका प्रवक्ता एवं डीएसपी ढुण्डीराज नेउपानेका अनुसार उनको बुधबार राति खुकुरी प्रहार गरि हत्या भएको पाइएको छ । 
सप्तकोशी–२ घर भई बैंकमा सुरक्षा गार्ड रहेका ५६ वर्षीय पर्शुराम फुयाँल मृत फेला परेका हुन् । उनी विगत ८ वर्षदेखि बैंकमा सुरक्षा गार्डको रुपमा कार्यरत थिए ।
गार्डको कोठा अबेरसम्म नखुलेपछि बैंकका कर्मचारीले ढोका खोलेर हेर्दा उनी मृत अवस्थामा फेला परेका थिए । वरिपरि रगतका टाटा पनि देखिएपछि अनुसन्धानकै क्रममा फुयालको हत्या भएको प्रहरीले जनाएको छ । 
प्रहरीका अनुसार बैंकको सिसिटिभी फुटेज हेर्दा राती करिव १२ वजे पछि नकावधारी व्यक्ति बैंकभित्र पसेको देखिएपछि घट्ना शंकास्पद रहेको र घटना स्थल वरिपरि रगतका टाटा देखिएकाले हत्या भएको जस्तो देखिएकोले घट्ना बारे थप अनुसन्धान सुरु गरिएको उल्लेख छ ।
सप्तरीका प्रहरी प्रवक्ता डीएसपी ढुण्डीराज नेउपानेले पनि सिसिटिभी फुटेज र शवको कोशी प्रदेश प्रहरी धरानबाट तालिम प्राप्त कुकुरको टोली आइसकेको र थप प्रकृया अघि बढेको उनले बताए  । 
मृतक फुयालका श्रीमती २ छोरा र २ छोरी छन्। उनी नेपाली सेनाबाट सेवा निवृत्त भएपछि गार्डको रुपमा काम गर्न थालेको मृतकका आफन्त दुर्गा फुयालले बताए ।