- उमेश चाम्लिङ
लेटाङ । करिव डेढ वर्ष अघि लेटाङ नगरपालिकाले प्रवेशद्वार सौन्दर्यकरण गर्न भन्दै रोपेका फूलका विरुवाहरु मर्न थालेका छन् । नगरपालिकाको प्रवेशद्वार गंगेचौकदेखि दक्षिण करिव १ किलोमिटर जंगल क्षेत्रमा दुवैतर्फ विभिन्न प्रजातिका फूलका विरुवा रोपिएकोमा दर्जनौं विरुवा मरेका छन् ।
लेटाङ नगरपालिकाको प्रवेशद्वार सौन्दर्यकरण गर्ने भन्दै नगरपालिकाले नगरको प्रवेशद्वारमा वृहत जनश्रमदानमार्फत डेढ वर्ष अघि फूलका विरुवाहरु रोपेको थियो । नगरपालिकाले विरुवा, मल र घेरावाराको व्यवस्था गरेको थियो भने जनश्रमदानद्वारा रोप्ने काम सम्पन्न भएको थियो ।
लामो समयदेखि फोहोर रहेको प्रवेशद्वार सुन्दर बन्ला भन्ने आशमा स्थानीयवासीले नगरपालिकाको अभियानमा सहयोग गर्दै जनश्रमदानमा सहभागी भएका थिए । तर राम्ररी हुर्कन नपाउँदै दजनौं विरुवाहरु मरिसकेका छन् । विरुवालाई घेराबारा गरेर संरक्षण गरेपनि नियमित रुपमा सिंचाई नहुँदा सुख्या भएर विरुवाहरु मरेका हुन् । जसका कारण प्रवेशद्वार सुन्दर बनाउने नगरपालिकाको अभियानमा ठेस लाग्ने देखिएको छ । 
यसैगरि लेटाङ नगरपालिकाको प्रवेशद्वारमा निर्माण गरिएको ट्राफिक प्रहरी विट समेत प्रयोगविहीन भएर अलपत्र परेको छ । लाखौं खर्च गरेर बनाइएको व्यवस्थित ट्राफिक बीटमा ट्राफिक प्रहरी बस्ने गरेका छैनन् । जसका कारण ट्राफिक बीट अलपत्र र बेस्याहार भएको छ ।
यसैगरि नगरपालिकाको प्रवेशद्वारमा जडान गरिएको सार्वजनिक धारामा पानी नआउँदा पैदलयात्रीलाई समस्या हुने गरेको छ । जंगलबाट घाँस दाउर गरेर आउने तथा मलामीबाट आउने मानिसहरुलाई लक्षीत गरि जडान गरिएको धारामा पानी आउन छाडेको भन्दै स्थानीय युवाहरुले गुनाशो गरेका छन् ।
