काठमाडौँ । सौर्य एयरको जहाज दुर्घटनामा ज्यान गुमाएका परिवारजनले न्यायिक छानबिनको माग गरेका छन्। सोमबार गृहमन्त्री रमेश लेखकलाई भेट्दै उनीहरूले सरकारले बनाएको छानबिन प्रतिवेदन अपुरो र पक्षपाती भएको दाबी गर्दै नयाँ आयोग गठन गर्न आग्रह गरेका हुन्।
दुर्घटनामा छोरी, ज्वाइँ र नाति गुमाएका सुनसरीका प्रकाश खतिवडाले बुझाएको मागपत्रमा रतिशचन्द्र लाल नेतृत्वको आयोगले पेश गरेको प्रतिवेदनले घटनाको वास्तविकता लुकाएको आरोप लगाइएको छ। प्रतिवेदनमा तथ्यगत त्रुटि रहेको र दोषीलाई जोगाउने नियत देखिएको भन्दै उनले आपत्ति जनाए।
उनले मानवीय लापरबाही र सौर्य एयरलाइन्सको गम्भीर त्रुटि देखिए पनि दोषीको पहिचान नभएकाले न्यायिक छानबिन आयोग अपरिहार्य भएको बताए। साथै, गैरकानुनी रूपमा ‘फेरी उडान’ गरेको, जहाजलाई पोखरा लैजानुको औचित्य नदेखिएको र कम्पनीले कानुन उल्लंघन गरेको प्रसंग प्रतिवेदनमा प्रस्ट्याउनै नसकिएको उल्लेख छ।
यसैगरी, पीडित परिवारलाई न्याय र क्षतिपूर्ति सम्बन्धी कुनै व्यवस्था नगरेको भन्दै उनीहरूले असन्तुष्टि जनाएका छन्।गृहमन्त्री लेखकले घटनाको पुनः छानबिनका लागि पहल गर्ने र पीडित परिवारलाई न्याय दिलाउने आश्वासन दिएका छन्।
२०७८ साउन ९ गते त्रिभुवन अन्तर्राष्ट्रिय विमानस्थलमा भएको दुर्घटनामा १८ जनाको ज्यान गएको थियो। तर, १८ मध्ये १० जनाको परिवारले अझै बीमाबापतको क्षतिपूर्ति पाएका छैनन्। उनीहरूमध्ये केहीले बीमा समितिमा उजुरी दर्ता गरिसके पनि अहिलेसम्म निर्णय भएको छैन।
