लेटाङ । नेकपा एमाले लेटाङ नगरपालिका ४ नम्बर शाखा कमिटीले पार्टीका अग्रज तथा सामाजिक व्यक्तित्व लक्ष्मण विकलाई सम्मान गरेको छ । ४ नम्बर शाखा कमिटीले आज लेटाङ ४ स्थित गंगे चौकमा विशेष कार्यक्रम आयोजना गरि ८४ औं जन्मोत्सवको अवसर पारेर आग्रज व्यक्तित्व विकलाई सम्मान गरेको हो ।
नेकपा एमाले कोशी प्रदेश कमिटी अध्यक्ष घनश्याम खतिवडाको प्रमुख आतिथ्यतामा भएको कार्यक्रममा आग्रज कम्युनिष्ट तथा समाजिक व्यक्तित्व विकलाई फूलमाला र दोसल्ला ओढाएर नगद १० हजार सहितसम्मान गरिएको हो । कार्यक्रममा बोल्दै अध्यक्ष खतिवडाले भूमिगत कालमा लेटाङ र सिंगै उत्तरी मोरङमा पार्टीका गतिविधि अघि बढाउन विकले योगदान पुर्याउनु भएको स्मरण गर्नुभयो । तत्कालिन समयमा लक्ष्मण विक जस्ता व्यक्तित्वहरुकै योगदानका कारण पार्टी अहिलेको अवस्थामा आएको भन्दै उहाँले पार्टीका नेताहरुले समेत उहाँहरुको योगदानको उच्च मूल्यांकन गर्नुपर्ने बताउनुभयो । 
कार्यक्रममा लेटाङ नगरपालिका प्रमुख तथा नेकपा एमाले कोशी प्रदेश कमिटी सदस्य भूपेन्द्र कुमार लावती, जिल्ला कमिटी सदस्य तथा लेटाङ नगरपालिका उपप्रमुख कृष्णकुमारी निरौला, सामाजिक व्यक्तित्व रामभक्त कुरुङ्वाङ लगायतले विकले लेटाङ क्षेत्रको विकासमा पुर्याएको योगदानको चर्चा गर्नुभयो ।
नेकपा एमाले ४ नम्बर शाखा कमिटी अध्यक्ष अवतार राईको अध्यक्षतमा भएको कार्यक्रममा पार्टीका जिल्ला कमिटी सदस्यहरु, नगर कमिटीका पदाधिकारी तथा सदस्यहरु, वडा कमिटीका पदाधिकारी तथा सदस्यहरु, विभिन्न वडाका वडाध्यक्षहरु तथा स्थानीयवासीको उल्लेख्य उपस्थिति रहेको थियो ।
