कञ्चनरूप । यस वर्षको अनुकूल मौसम र आँपका रुखमा प्रशस्त मञ्जरी लागेकाले सप्तरीमा आँप उत्पादन उल्लेख्य रूपमा बढ्ने अनुमान गरिएको छ । कृषि ज्ञान केन्द्र सप्तरीका अनुसार जिल्लाभरी आँपका बोटहरूमा पातै नदेखिने गरी फूल फुलेका छन्, जसले किसानमा उत्साह थपेको छ ।
साना बारीदेखि ठूला व्यावसायिक बगैँचासम्म यतिबेला आँपका रुख फूलले ढाकिएका छन् । उत्पादन बढ्ने संकेत देखिएसँगै किसानहरू यस वर्ष राम्रो आम्दानी हुने अपेक्षामा छन् ।
कृषि ज्ञान केन्द्रको तथ्यांक अनुसार सप्तरीमा यस वर्ष ८ हजार २ सय ५३ हेक्टर क्षेत्रफलमा आँप खेती गरिएको कृषि ज्ञान केन्द्रका कार्यलय प्रमुख किसुनदेव राउतले जनाउनु भएको छ । ती क्षेत्रबाट करिब ७५ हजार मेट्रिक टन आँप उत्पादन हुने अनुमान गरिएको छ । अनुकूल मौसम कायम रहे र हावाहुरी तथा असिनाको असर नगरे अपेक्षित परिणाम आउने कार्यालयको विश्वास छ ।
कृषि ज्ञान केन्द्र सप्तरीका प्रमुख राउतका अनुसार आँप बाली एक वर्ष बढी र अर्को वर्ष कम फल्ने प्रकृतिको हुन्छ। “यस वर्ष फूल राम्रो लागेकाले उत्पादन उल्लेख्य हुने अनुमान गरेका छौँ,” उहाँले बताउनभयो ।
सप्तरीमा उत्पादन हुने आँप स्थानीय बजारसँगै काठमाडौं, नारायणघाट, पोखरा, विराटनगर, धरानलगायतका सहरमा पुग्ने गरेको छ । माग उच्च रहने भएकाले किसानहरू फूल लाग्नासाथ बगैँचा ठेक्कामा दिने चलन पनि बढ्दो छ । यसले बजार व्यवस्थापनको झन्झट कम गरिदिएको किसानहरू बताउँछन् । जिल्लामा सबैभन्दा बढी मालदह जातको आँप लगाइएको छ । साथै कृष्णभोग, बम्बै, अम्रपाली, दार्जिलिङ केलवा, कलकतिया लगायतका जातका आँप पनि व्यावसायिक रूपमा खेती गरिन्छ । सबै जातमा यतिबेला राम्ररी फूल लागेको कृषि प्राविधिकहरूको भनाइ छ ।
शम्भुनाथ, सीतापुर, फत्तेपुर, लोहाजारा, महुली, मोहनपुर, रुपनी, बेल्हा, रूपनगर, कञ्चनपुर, कदमहा, कल्याणपुर र जोगमोहन क्षेत्रमा व्यावसायिक आँप उत्पादन बढी हुने गरेको छ। सुख्खा जमिनमा अन्य बाली राम्रो नफस्टाउने र सिँचाइको सुविधा सीमित रहेकाले किसानहरू व्यावसायिक आँप खेतीतर्फ आकर्षित भएका हुन् ।
तर, उत्पादन राम्रो हुन चैत्र–वैशाखमा चल्ने हावाहुरी, असिना र मधुवाजस्ता रोगबाट जोगाउनुपर्ने चुनौती भने कायमै छ। ती जोखिम नियन्त्रण गर्न सके यस वर्ष आँपले किसानको अनुहारमा मुस्कान ल्याउने देखिन्छ ।
मधेश प्रदेशमा मात्रै करिब २९ हजार ९९ हेक्टर क्षेत्रफलमा आँप खेती हुने गरेको छ । तराईका सप्तरी, सिरहा, धनुषालगायतका जिल्लामा आँप उत्पादन व्यापक छ । मधेशका जिल्लामा फल्ने मालदह, दसहरी, आम्रपाली, बम्बै र कलकतिया जातका आँप स्वाद, रसिलोपन र गुणस्तरका कारण देशभर माग हुने गरेको छ ।
अनुकूल मौसमले साथ दिए यस वर्ष सप्तरीको आँपबारीबाट मिठास मात्र होइन, किसानको आम्दानी पनि बढ्ने अपेक्षा गरिएको छ ।
