कञ्चनरूप । आसन्न प्रतिनिधि सभा निर्वाचनलाई लक्षित गर्दै सप्तरी जिल्ला प्रशासनले मदिरा तथा सुर्तीजन्य पदार्थको बिक्री–वितरणमा कडाइ गर्ने भएको छ। निर्वाचनलाई स्वच्छ र मर्यादित बनाउन अवैध मदिरा ओसारपसार तथा बिक्री रोक्न विशेष अनुगमन गरिने जनाइएको छ।
प्रमुख जिल्ला अधिकारी टुवराज पोखरेलको अध्यक्षतामा बसेको बैठकले अनुमति बिना मदिरा बिक्री गर्न पूर्ण निषेध गर्ने निर्णय गरेको छ। होटल तथा रेस्टुरेन्टमा मदिरा सेवन समय बेलुका ८ बजेसम्म मात्र तोकिएको छ।
साथै मिठाई पसल, किराना तथा पान पसलहरूको अनुगमनसमेत तीव्र बनाइने भएको छ। म्याद गुज्रेका सामान बिक्री गरेको पाइएमा कारबाही गरिने प्रशासनले जनाएको छ। विद्यालय, कलेज र स्वास्थ्य संस्थाबाट १०० मिटरभित्र सुर्तीजन्य पदार्थ बिक्रीमा रोक लगाइनेछ।
