राजविराज, । निर्वाचन आचारसंहिता पूर्ण रूपमा पालना गर्न राजनीतिक दल, सञ्चारकर्मी तथा नियामक निकाय सबै पक्ष जिम्मेवार बन्नुपर्नेमा जोड दिइएको छ। प्रेस काउन्सिल नेपालको आयोजना र नेपाल पत्रकार महासंघ सप्तरीको संयोजनमा आयोजित ‘निर्वाचन आचारसंहिता र मिडियाको भूमिका’ विषयक अन्तरक्रिया कार्यक्रममा वक्ताहरूले यस्तो बताएका हुन्।
कार्यक्रमका सहभागीहरूले निर्वाचन अवधिमा मिडियाको भूमिका अत्यन्त संवेदनशील हुने उल्लेख गर्दै समाचार सम्प्रेषण गर्दा सत्य–तथ्य, सन्तुलन र निष्पक्षतालाई प्राथमिकता दिनुपर्ने बताए। साना गल्तीले पनि ठूलो प्रभाव पार्न सक्ने भएकाले पत्रकारहरू अझ जिम्मेवार र सजग हुनुपर्ने धारणा व्यक्त गरिएको थियो।
अन्तरक्रियामा निर्वाचन आचारसंहिताका प्रावधान, सामाजिक सञ्जालको प्रयोग, भ्रामक सूचना नियन्त्रण तथा उम्मेदवारबीच सन्तुलित समाचार सम्प्रेषणका विषयमा छलफल गरिएको थियो। सहभागीहरूले अफवाह र अपुष्ट सूचनाबाट बच्न फ्याक्ट–चेकलाई प्राथमिकता दिन सुझाव दिएका थिए।
कार्यक्रममा विभिन्न सरकारी निकायका प्रमुख, पत्रकार तथा सरोकारवालाहरूको सहभागिता रहेको थियो। आयोजकका अनुसार कार्यक्रममा उठेका सुझावहरू आगामी निर्वाचन अवधिमा व्यवहारमा उतार्ने प्रतिबद्धता व्यक्त गरिएको छ।
