कञ्चनरूप । राष्ट्रिय स्वतन्त्र पार्टीका सभापति रवि लामिछानेको रिहाइको माग गर्दै कार्यकर्ताले शनिबार सप्तरीको कञ्चनरूप नगरपालिका स्थित रूपनगरमा प्रदर्शन गरेका छन् ।
पोखराको सूर्यदर्शन सहकारी ठगी प्रकरणमा सभापति पक्राउका लामिछानेलाई निशर्त रिहाईको माग गर्दै राष्ट्रिय स्वतन्त्र पार्टीका कार्यकर्ताहरूले आन्दोलनमा उत्रिएका हुन् । विरोधमा कार्यकर्ताहरूले ‘सहकारी पीडितलाई न्याय दे’, ‘राजनीतिक प्रतिशोधको खेल बन्द गर, ‘लोकतन्त्रमा अन्यायलाई ठाउँ छैन’ भनेर लेखिएको प्लेकार्ड समेत बोकेका थिए ।
रास्वपाका नेताकार्यकर्ताले रूपनगर देखी स्थानीय काष्ठमहल हटियामा सम्म प्रदर्शन गरी कोणसभा गरेका थिए ।
कोणसभालाई सम्बोधन गर्दै वक्ताहरूले रवि लामिछानेलाई राजनीतिक प्रतिशोध साध्न सरकारले गिरफ्तार गरेको आरोप लगाए । रवि लामिछाने निर्दोष भएको दावी गर्दै उनीहरूले निसर्त रिहाई नगरिए थप सशक्त आन्दोलनमा उत्रिने चेतावनी समेत दिए ।
लामिछाने २ कात्तिकमा पार्टी मुख्यालय वनस्थलीबाटै पक्राउ परेका थिए । लामिछानेलाई अदालतले अनुसन्धान गर्न पक्राउ परेको दिनदेखि नै लागू हुनेगरि ६ दिनको म्याद थपेको थियो । तर बयान नसकिएपछि उनीमाथि अनुसन्धान गर्न प्रहरीले बिहीबार फेरी ७ दिनको म्याद थपेको छ ।
