कञ्चनरूप । सप्तरीको कञ्चनरूप नगरपालिकामा उत्पन्न नेतृत्वगत विवादले पूर्वाधार निर्माण, रोजगारी सिर्जना, ठेक्का कार्यान्वयन तथा स्थानीय अर्थतन्त्रमा गम्भीर नकारात्मक असर पारेको भन्दै पूर्व नगरप्रमुख बसन्त मिश्रले वर्तमान नगर नेतृत्वप्रति कडा टिप्पणी गरेका छन्।
कञ्चनरूप नगरपालिकामा आयोजित सातौँ माघी महोत्सवको सांस्कृतिक कार्यक्रममा बोल्दै पूर्व नगरप्रमुख मिश्रले नगरभित्रको प्रशासनिक अन्योल र असमझदारीले जनजीवन नै प्रभावित बनेको बताए। उनले सबैभन्दा दुःखद पक्ष शिक्षक तथा कर्मचारीहरू महिनौँदेखि मानसिक तनावमा बस्न बाध्य भएको उल्लेख गरे।
“कसैको छोराछोरीको विवाह गर्नुपर्ने अवस्था छ, कसैको घरभाडा तिर्न बाँकी होला,” उनले भने, “तर नगर नेतृत्वको गैरजिम्मेवार कार्यशैलीका कारण कर्मचारीहरू पीडित बन्नुपरेको छ।”
पूर्व नगरप्रमुख मिश्रले आफ्नो कार्यकाल स्मरण गर्दै आफू दुई पार्टीको समर्थनबाट निर्वाचित भए पनि कसैलाई दुःख नदिएको दाबी गरे। “हाम्रो पालामा विकास, सेवा प्रवाह र प्रशासनिक काम सहकार्य र उत्साहका साथ अघि बढाइयो,” उनले भने, “अहिलेको अवस्था त्यसको ठीक उल्टो देखिएको छ।”
हाल कञ्चनरूप नगरपालिकामा देखिएको विवाद नगरप्रमुख र उप–प्रमुखबीचको तनावसँग प्रत्यक्ष रूपमा जोडिएको छ। उप–प्रमुखले आफ्नो अधिकार खोसिएको आरोप लगाउँदै अदालतमा मुद्दा दायर गरेपछि नगरसभाको नियमित बैठक बस्न सकेको छैन। यसले बजेट स्वीकृति, तलब भुक्तानी र अन्य अत्यावश्यक प्रशासनिक निर्णयहरूमा गम्भीर अवरोध सिर्जना गरेको छ।
विवादको सबैभन्दा संवेदनशील र चिन्ताजनक पक्ष शिक्षक तथा कर्मचारीको तलब भुक्तानीसँग सम्बन्धित विषय बनेको छ। जनप्रतिनिधिहरूबीचको लिखित सहमति भए पनि कानुनी अन्योल देखाउँदै तलब समयमै भुक्तानी नहुनु स्थानीय सरकारको न्यूनतम दायित्वसमेत पूरा हुन नसकेको स्पष्ट संकेत भएको टिप्पणी गरिएको छ।
स्थानीय बासिन्दाहरूका अनुसार यस्तो अवस्थाले नगरपालिकाको सेवा प्रवाह मात्र होइन, विकास योजना, रोजगारको अवसर र स्थानीय अर्थतन्त्रसमेत ठप्प बनेको छ। जनप्रतिनिधिहरूबीचको आन्तरिक शक्ति सङ्घर्षको मूल्य आम नागरिक र कर्मचारीले चुकाउनुपरेको भन्दै व्यापक असन्तोष देखिन थालेको छ।
