कञ्चनरूप । विद्यालयमा छात्रालाई यौन दुर्व्यवहार गरेको आरोपमा सप्तरीको सप्तकोसी नगरपालिकाको एक विद्यालयका एक शिक्षक पक्राउ परेका छन् ।
छात्रालाई यौन दुर्व्यवहार गरेको आरोपमा सप्तरीमा एक शिक्षक पक्राउ
२१ फाल्गुन २०८१, बुधवार
गत मङ्गलबार विद्यालयमा करार सेवामा शिक्षक पदमा कार्यरत ३३ वर्षीय शिक्षकले विद्यालयमा अध्ययनरत एक छात्रामाथि विद्यालयको कोठामा यौन दुर्व्यवहार गरेको पाइएको प्रहरीले जनाएको छ ।
प्राक्टिकल विषयमा राम्रो अङ्क दिने र सोही विषयमा केही कुरा गर्नेछु भन्दै शिक्षकले छात्रालाई कक्षाकोठामा यौन दुर्व्यवहार गर्न थालेपछी आफू चिच्याएको पीडित छात्राले प्रहरी समक्ष बयान दिएकी छिन् ।
कोठामा लगेर शिक्षकले छात्रालाई जिउमा सुम्सुम्याउने‚ अङ्गालो हाल्ने‚ कपाल तान्ने‚ जस्ता क्रियाकलाप गर्न लागेपछि छात्राले हल्ला गरेकी थिइन् । छात्राको हल्ला सुनेर पुगेका विद्यार्थी र अभिभावकले शिक्षकलाई नियन्त्रणमा लिएर प्रहरीलाई खवर गरेका थिए ।
पीडित छात्राका आफन्तले बुधबार इलाका प्रहरी कार्यालय कञ्चनपुरमा शिक्षकविरुद्ध उजुरी दिएको इलाका प्रहरी कार्यालय कञ्चनपुरका प्रहरी नायब उपरीक्षक महेन्द्र नेपालले जानकारी दिएका छन ।
पक्राउ परेका शिक्षकलाई बुधबार सप्तरी जिल्ला अदालतबाट म्याद थप गरेर यौन दुर्व्यवहार कसुरमा अनुसन्धान अघि बढाइएको उनले बताए ।
