राजविराज / काठमाडौं । विदेश भ्रमणको लोभ देखाएर सर्वसाधारणलाई ‘ट्राभल लोटरी’ परेको भन्दै ठगी गर्ने गिरोहमा संलग्न रहेको आरोपमा सप्तरीका एक युवकसहित सात जनालाई प्रहरीले काठमाडौंबाट पक्राउ गरेको छ। प्रारम्भिक अनुसन्धानमै उनीहरूले ३२८ जनाबाट करिब रु २ करोड ७२ लाख ६५ हजार ५७४ ठगी गरेको खुलेको छ।
काठमाडौं उपत्यका अपराध अनुसन्धान कार्यालय टेकुका अनुसार गिरोहले काठमाडौं महानगरपालिका–१० थापागाउँ, लाखेचौर मार्गमा ‘सिर्तेल होलिडेज प्रा।लि।’ नामक ट्राभल एजेन्सी सञ्चालन गर्दै आएको थियो। सोही एजेन्सीमार्फत सर्वसाधारणलाई युरोप, एसिया, अफ्रिका लगायत १७५ देशमा अत्यन्त सस्तो दरमा भ्रमण गराइदिने प्रलोभन देखाइन्थ्यो।
प्रहरीका अनुसार विभिन्न मोबाइल नम्बरबाट फोन गरी ‘तपाईंलाई ट्राभल लोटरी परेको छ’ भन्दै पीडितलाई झुक्याइन्थ्यो। त्यसपछि न्यून शुल्कमै विदेश भ्रमण गराइदिने विश्वास दिलाएर रकम असुल्ने, तर न भ्रमण गराउने न त रकम फिर्ता गर्ने गरेको उजुरीपछि प्रहरीले छापा मारेर सात जनालाई नियन्त्रणमा लिएको हो।
पक्राउ पर्नेमा सप्तरीको कञ्चनरूप नगरपालिका–१२ घर भई हाल भक्तपुरको मध्यपुर थिमी–२ गठ्ठाघर बस्दै आएका २६ वर्षीय बिबेक रेग्मी रहेका छन्। उनीसँगै भारतको तेलंगाना, हैदरावादका विभिन्न स्थान घर भएका हुसेन सैयद (३९), साजिद ओमर सैयद (४४), महम्मद ईमरान (३४(, मिर खालिद हुसेन (३३), रजाक महम्मद (४०) र समादा गिरी (४२) पक्राउ परेका छन्।
प्रहरीले उनीहरूको साथबाट नेपाली नगद रु ७ लाख, कम्प्युटर १ थान, ल्यापटप १ थान, ट्याब १ थान, विभिन्न छाप ५ थान, रिसिप्ट प्याड ३ थान तथा विभिन्न व्यक्तिको नाम, ठेगाना र मोबाइल नम्बर उल्लेख भएका कुपनका अर्धकट्टी ५ हजार ७५ थान बरामद गरेको जनाएको छ।
प्रहरीका अनुसार प्रारम्भिक अनुसन्धानमै गिरोहले सयौं व्यक्तिलाई योजनाबद्ध रूपमा जालमा पारेर ठूलो रकम उठाएको देखिएको छ। पक्राउ परेका सबैलाई थप अनुसन्धान तथा कानुनी कारबाहीका लागि जिल्ला प्रहरी परिसर काठमाडौं पठाइएको छ।
