कञ्चनरूप। प्रतिनिधिसभा सदस्य खगेन्द्र कर्णले संस्कृति, परम्परा, भाषा, मौलिक पहिचान र गुठीको संरक्षण कुनै राजनीतिक दलको एजेन्डा नभई समग्र समाजको साझा जिम्मेवारी भएको बताएका छन्। उनले सांस्कृतिक सम्पदाको संरक्षण र पुस्तान्तरणका लागि राजनीतिक आस्था तथा दलगत स्वार्थभन्दा माथि उठेर सबै पक्ष एकजुट हुनुपर्नेमा जोड दिएका छन्।
मंगलबार नेपाल संवत् ११४७ को नयाँ वर्ष तथा न्हूदँया भिन्तुनाको अवसरमा नेवा: समाज रुपनगर, सप्तरी परिवारद्वारा बस्तीपुरस्थित नेवा: गुठी सभा गृहमा आयोजित शुभकामना आदानप्रदान कार्यक्रममा बोल्दै सांसद कर्णले यस्तो धारणा व्यक्त गरेका हुन्।
उनले संस्कृति केवल चाडपर्व मनाउने परम्परा मात्र नभई कुनै पनि समुदायको इतिहास, सभ्यता, जीवनशैली र पहिचानसँग जोडिएको महत्वपूर्ण आधार भएको बताए। पुस्तौँदेखि चल्दै आएका भाषा, संस्कार, रीतिरिवाज, कला, सम्पदा र सामाजिक परम्पराले समाजलाई आफ्नो मौलिक पहिचान दिने उल्लेख गर्दै यिनको संरक्षण गर्नु वर्तमान पुस्ताको महत्वपूर्ण दायित्व भएको उनको भनाइ थियो।
सांसद कर्णले गुठीलाई केवल धार्मिक तथा सांस्कृतिक गतिविधि सञ्चालन गर्ने संस्थाका रूपमा मात्र नहेरी सामाजिक एकता, सामूहिक सहकार्य र पुस्तौँदेखिको सभ्यताको निरन्तरतासँग जोडेर बुझ्नुपर्ने बताए। गुठी तथा सांस्कृतिक संस्थाहरूले समाजमा आपसी सद्भाव, सहयोग र सामुदायिक सम्बन्ध बलियो बनाउन महत्वपूर्ण भूमिका निर्वाह गर्दै आएको उनको धारणा थियो।
उनले राजनीतिक विचार र दल फरक हुन सक्ने भए पनि भाषा, संस्कृति, परम्परा र सामाजिक पहिचान सबैको साझा सम्पत्ति भएको उल्लेख गरे। राजनीतिक प्रतिस्पर्धा र मतभिन्नता आफ्नो ठाउँमा रहे पनि सांस्कृतिक सम्पदाको संरक्षणको विषयमा सबै एक ठाउँमा उभिनुपर्ने उनको आग्रह थियो।
सांस्कृतिक पहिचान संरक्षणको जिम्मेवारी कुनै एक समुदाय वा संस्थामा मात्र सीमित नरहेको उल्लेख गर्दै उनले नयाँ पुस्तालाई आफ्नो मौलिक संस्कृति, इतिहास र परम्पराबारे परिचित गराउनुपर्ने आवश्यकता औँल्याए।
यसै अवसरमा सांसद कर्णले नेपाल संवत् ११४७ को नयाँ वर्ष तथा न्हूदँया भिन्तुनाको अवसरमा नेवा: समुदायसहित सम्पूर्ण नेपालीमा सुख, शान्ति, समृद्धि, आपसी सद्भाव र उत्तरोत्तर प्रगतिको शुभकामना व्यक्त गरेका थिए।
नेपाल संवत् नेवार समुदायको मौलिक सांस्कृतिक पहिचानसँग जोडिएको ऐतिहासिक संवत् हो। न्हूदँया भिन्तुना नयाँ वर्षको शुभकामना आदानप्रदान गर्ने परम्परा हो। यसले नयाँ सुरुवातसँगै सामाजिक सद्भाव, सामूहिक एकता र सांस्कृतिक निरन्तरताको सन्देशसमेत प्रवाह गर्छ।
