रौतहट । रौतहटमा सुटकेशभित्र फेला परेकी महिलाको पहिचान खुलेको छ।
जिल्ला प्रहरी कार्यालय रौतहटका अनुसार शव माधवनारायण नगरपालिका–६ माधोपुर माइत भएकी २६ वर्षीया रुबिकुमारी साहको रहेको पुष्टि भएको हो। भारतको मजफरपुरमा विवाह भएकी साह हाल गौर नगरपालिका–२ महादेवपट्टीमा डेरामा बस्दै बालबालिकालाई पढाउँदै आएकी थिइन्।
शनिबार राति गौर–सिरसिया सडकखण्ड अन्तर्गत मुडवलबा मोड नजिक सुटकेश देखेपछि स्थानीयले प्रहरीलाई खबर गरेका थिए। घटनास्थल पुगेको प्रहरीले रस्सीले बाँधिएको अवस्थामा फेला परेको सुटकेश खोल्दा भित्र साहको शव भेटिएको हो।
प्रहरी नायब उपरीक्षक ९डिएसपी० राजु कार्कीका अनुसार मृतकको नाकबाट रगत बगेको र घाँटीमा डाम देखिएको छ। प्रारम्भिक अनुसन्धानमा हत्या गरी शव लुकाउन सुटकेशमा राखिएको हुन सक्ने अनुमान गरिएको छ।
शवलाई पोष्टमार्टमका लागि प्रादेशिक अस्पताल गौर पठाइएको छ। यो घटनालाई योजनाबद्ध आपराधिक गतिविधि मान्दै प्रहरीले विभिन्न कोणबाट अनुसन्धान अघि बढाएको जनाएको छ।
