अस्पतालको गेटबाहिर प्रसूति : छानबिन नसकिँदै ६ कर्मचारी हटाइए

राजविराज । गजेन्द्रनारायण सिंह अस्पताल, राजविराजको मूल गेटबाहिर महिलाले बच्चा जन्माएको घटनापछि अस्पताल प्रशासनले चिकित्सकसहित ६ कर्मचारीलाई कामकाजबाट हटाएको छ।
मंगलबार राति श्रीमान् हरेराम पासवानसँग प्रसूति सेवाका लागि अस्पताल पुगेकी बबिताले बुधबार बिहान करिब ४ः३० बजे अस्पतालको गेटबाहिर सडकमा नै बच्चा जन्माएकी थिइन्।
घटना सामाजिक सञ्जालमा सार्वजनिक भएपछि अस्पतालको सेवा र कर्मचारीको व्यवहारमाथि प्रश्न उठेको थियो। पीडितका श्रीमान्लाई सुरक्षा गार्डले धम्की दिएको आरोपसमेत सार्वजनिक भएपछि स्थानीयहरू अस्पताल परिसरमा भेला भएर विरोध जनाएका छन्।
अस्पतालले घटनाको छानबिनका लागि गठित समितिहरूको अन्तिम प्रतिवेदन नआएसम्मका लागि डा. उषा देव, स्टाफ नर्स मनिषा कुमारी साह, स्टाफ नर्स सजन चौधरी, कार्यालय सहयोगी रेणु ठाकुर, स्वीपर कृष्ण मेहतर र सुरक्षा गार्ड देवकान्त झालाई कामकाजबाट हटाएको जनाएको छ।
अस्पतालका निमित्त मेडिकल सुपरिटेन्डेन्ट डा. रणजित कुमार झाले समितिको प्रतिवेदनका आधारमा थप आवश्यक निर्णय गरिने बताए।
स्थानीयले बिरामी र आफन्तसँग अभद्र व्यवहार तथा धम्की रोक्न, प्रसूति सेवा प्रभावकारी बनाउन र घटनाको निष्पक्ष छानबिन गरी दोषीमाथि कारबाही गर्न माग गरेका छन्।