कञ्चनरूप । सप्तकोशी नदीमा निरन्तर पानीको बहाव बढेपछि अहिले खतराको सङ्केत रातो बत्ती बालिएको छ ।
जलसतह उच्च भएपछि खतराको सङ्केत रातो बत्ती बालेर शनिबार ५६ मध्ये ३९ ढोका खुल्ला गरेको भने सप्तकोसी नदीको जलसतह आज यस वर्षकै सबैभन्दा उच्च मापन भएको छ । साँझ ६ बजे कोसी ब्यारेजमा पानीको बहाव बढेर प्रतिसेकेण्ड ३ लाख ३ हजार ८ सय ६० क्युसेक जलसतह मापन गरिएको नियन्त्रण मापन केन्द्रले जानकारी दिएको छ ।
पहाडी क्षेत्रमा शुक्रबारदेखि निरन्तर वर्षा भएसँगै कोसी नदीमा जलसतह उच्च भएको हो । जलसतह उच्च भए पछि कोसीमा खतराको सङ्केत राखिएको छ । अहिले सम्म बाँधमा कुनै क्षति नभएको केन्द्रले जनाएको छ ।
पानीको बहाव बढ्दै जाँदा दुवै जिल्लाका प्रमुख जिल्ला अधिकारीले सीमा पारिका जिल्लाका डिएम तथा सम्बन्धित निकायसँग समन्वय गरेर ढोका खोल्ने काम भइरहेको सप्तरीका प्रमुख जिल्ला अधिकारी मेखबहादुर मग्रान्तीले जानकारी दिए ।
बहाव उच्च भएसँगै सप्तकोशी नदीको बीचमा रहेको गोबरगाडा गाउँका बासिन्दा घेरिएका छन्। गोबरगाढाका स्थानीय अहिले सुरक्षित रहेको र जोखिम देखिए उद्धार गर्ने हनुमान नगर कङ्कालिनी नगरपालिकाका नगरप्रमुख वीरेन्द्र माझीले जानकारी दिए ।
