कञ्चनरूप । राजविराज विमानस्थलबाट सोमबार ठूलो परिमाणमा अवैध विदेशी मुद्रासहित एक युवक पक्राउ परेका छन्।
पक्राउ पर्नेमा सप्तरी जिल्ला खडक नगरपालिका–११ का ३३ वर्षीय मोहमद खुर्सिद आलम रहेका छन्। उनी बुद्ध एयरको जहाजमार्फत राजविराजबाट काठमाडौं जान लागेका थिए। विमानस्थलमा चेकजाँचको क्रममा आलमको साथबाट स्रोत नखुलेको साउदी रियाल ३५ हजार ९७६ बरामद भएको प्रहरीले जनाएको छ।
सप्तरीका प्रहरी उपरीक्षक गौतमकुमार केसीका अनुसार आलमले उक्त रकमको वैधता प्रमाणित गर्न नसकेपछि उनलाई नियन्त्रणमा लिइएको हो।
“रकम कहाँबाट आएको भन्ने कुनै प्रमाण देखाउन नसकेपछि उनलाई नियन्त्रणमा लिइएको हो,” केसीले भने, “अब उनीविरुद्ध आवश्यक कानुनी प्रक्रिया अघि बढाइनेछ।”
बरामद रकमसहित आलमलाई आन्तरिक राजस्व कार्यालय इटहरीमा बुझाउने तयारी भइरहेको प्रहरी स्रोतले जानकारी दिएको छ। प्रारम्भिक अनुसन्धान अनुसार यो घटना विदेशी मुद्रा अवैध ओसारपसार (हवाला कारोबार) अन्तर्गत पर्ने सम्भावना रहेको प्रहरीले जनाएको छ।
