कञ्चनरूप । सप्तरीको कञ्चनरूप नगरपालिका–१२ धरमपुरस्थित साइफन क्षेत्रमा बुधबार दिउँसो जङ्गली हात्तीको आक्रमण हुँदा एक वृद्धा गम्भीर घाइते भएकी छन्।
स्थानीय ६९ वर्षीया खड्गमती राई गोठालो गएका बेला करिब ३ बजेतिर अचानक आएको हात्तीले आक्रमण गरेको बताइएको छ। शान्त देखिएको हात्ती एक्कासि आक्रामक बन्दै उनीमाथि जाइलाग्दा राई गम्भीर घाइते भएकी हुन्।
घटनापछि स्थानीयवासीले तत्काल उद्धार गरी धर्मेश्वर अस्पतालमा पुर्याएका थिए। प्राथमिक उपचारपछि थप उपचारका लागि विराटनगर रेफर गरिएको इलाका प्रहरी कार्यालय कञ्चनपुर ले जनाएको छ। हाल उनको उपचार विराटनगर स्थित न्युरो अस्पताल मा भइरहेको छ।
परिवारजनका अनुसार राईको खुट्टा र कम्मरमुनि भागमा गम्भीर चोट लागेको छ र अवस्था अझै जोखिमपूर्ण रहेको छ। हात्तीले आक्रमणका क्रममा स्थानीय एक पसलमा समेत तोडफोड गरी क्षति पुर्याएको उल्लेख छ।
धरमपुर र आसपासका क्षेत्रमा पछिल्लो समय जङ्गली हात्तीको गतिविधि बढ्दै जाँदा स्थानीयवासी त्रसित बनेका छन्। वन्यजन्तु नियन्त्रण तथा सुरक्षाका लागि प्रभावकारी कदम चाल्न स्थानीयले सम्बन्धित निकायसँग माग गरेका छन्।
