पडेमारामा आइतबार दिउँसो करिब ३ बजे सरदार टोल भएको भीषण आगलागीमा परेर ११ परिवारको २३ वटा घर जलेर नष्ट भएको प्रारम्भिक अनुमान छ । यद्यपि, पूर्ण विवरण भने आउन बाँकी प्रहरीले जनाएको छ ।
सरदार टोलका लालमोहन सरदारको गोठमा रहेको चुलोमा बालेको आगोबाट दिउँसो करिव ३ बजे आगलागी सुरु भएको इलाका प्रहरी कार्यालय कञ्चनपुरले जनाएको छ ।
आगलागीबाट लालमोहन सरदारको टिनको छाना भएको चार वटा घर, बिजुली सदारको तीन वटा, आशा सरदार, लालबहादुर सरदार, सुधीर सरदार, बिर बहादुर सरदार, श्यामबहादुर सरदार, रामबहादुर सरदार र बुटु सरदारको दुई–दुईवटा तथा त्रिभुवन सरदार, करण चौधरी र समुन्द्री सरदारको एक–एकवटा गरी २४ वटा घर जलेर नष्ट भएको छ ।
आगलागीमा एउटा बाख्रा र एउटा पाठोको समेत जलेर मरेका छन् । आगलागीमा घरसँगै खाद्यान्न, लत्ताकपडा सहित सरसामानहरू जलेर नष्ट हुँदा २४ लाख २५ हजार रुपैयाँ बराबरको क्षति भएको प्रारम्भिक अनुमान छ ।
कन्चनपुर, राजविराज , हनुमाननगर नगरपालिका र नेपाल प्रहरीको ४ वटा दमकल, नेपाल प्रहरी, सशस्त्र प्रहरी, नेपाली सेना र स्थानीयको सहयोगमा दिउँसो करिब साढे ४ बजे आगलागी नियन्त्रणमा आएको प्रहरीले जनाएको छ । दिउँसोको अत्याधिक हावाका कारण आगो नियन्त्रणमा ढिलाई भएको स्थानीयले बताएका छन् ।
