मोरङ । लेटाङ कानेपोखरी सडकखण्डमा भएको सवारी दुर्घटनमा परि २ जनाको मृत्यु भएको छ । शुक्रबार साँझ लेटाङ कानेपोखरी सडकखण्डको फायरलाइन क्षेत्रमा प्रदेश १ ०२ ००२ च ४१७३ नम्बरको बोलेरोले प्रदेश १ ०२ ००३ ह १३१२ टेम्पोलाई ठक्कर दिंदा टेम्पो चालक कानेपोखरी ६ बस्ने सागर तामाङसहित २ जनाको मृत्यु भएको हो । 
चालक तामाङको उपचारका लागि अस्पताल लैजाँदै गर्दा र टेम्पोमा सवार कानेपोखरी ६ कै अन्दाजी ८ वर्षीया बालिका रोशनी मगरको उपचारका क्रममा गोल्डेन अस्पताल विराटनगरमा मृत्यु भएको हो । टेम्पोमा सवार कानेपोखरी ६ कै अन्दाजी ३५ वर्षीया टीका आले मगर गम्भीर घाईते भएकोमा गोल्डेन अस्पताल विराटनगरमा उपचार भइरहेको छ । कानेपोखरीबाट लेटाङ फर्कंदै गरेको बोलेरोले लेटाङबाट कानेपोखरी झर्दै गरेको अटोलाई ठक्कर दिएर दुर्घटना भएको बताइएको छ । बोलेरो र चालक लेटाङ ६ बस्ने सन्तोष घिसिङलाई ईलाका प्रहरी कार्यालय लेटाङले नियन्त्रणमा लिएको छ । दुर्घटना भएको ठाउँ नजिकै सडकमा रुख लडेको र एकतर्फिमात्र बाटो क्लियर गरेकाले दुर्घटना भएको हुनसक्ने बताइएको छ ।
