राजबिराज । रविवारको बिहानदेखि नै राजबिराजको वातावरण आध्यात्मिक र संगीतमय बनेको थियो। राधाकृष्णको भव्य रथ सजिएपछि, हजारौं भक्तजन टोल–टोलबाट नाच्दै, गाउँदै रथ यात्रामा सहभागी हुन आएका थिए।
बिहारपुरस्थित राधाकृष्ण मन्दिरबाट सुरु भएको रथ यात्रा रुपनी मोड, हनुमान मन्दिर, गुलाब ग्यारेज, यदुबंसी चौक, राजदेवी मन्दिर, तेतरी गाछी, नेता चौक हुँदै गजेन्द्र चौक, राम मन्दिर र अदालत रोड पार गर्दै पुनः कृष्ण मन्दिरमै टुंगिएको थियो। यात्राभर राजबिराजका सडकहरू फूलमालाले सजिएका थिए भने भजन–कीर्तन, ढोल–नगारा र शंखध्वनीले शहरलाई मन्दिरझैं पवित्र बनाइदिएको थियो।
मुल समारोह समिति राजबिराजद्वारा आयोजित उक्त रथ यात्रामा हजारौं नागरिकहरूको सहभागिता रहेको संयोजक अनिल यादवले जानकारी दिए। उनका अनुसार, यस वर्षको रथ यात्रा विगतका वर्षभन्दा अझै बढी आकर्षक र भव्य बनेको थियो।
यसै दिनलाई ‘मोहरात्रि’ पनि भनिन्छ, किनभने द्वापरयुगमा भाद्र कृष्ण अष्टमीको मध्यरातमा भगवान् श्रीकृष्ण जन्मेका थिए। भक्तजनहरूलाई यस दिनको महत्त्व सम्झाइँदै प्रवचनमा भनियो— “ज्ञानयोग, कर्मयोग र भक्तियोगका प्रणेता भगवान् कृष्णको जन्म मातृभूमि मथुराको जेलभित्र भएको थियो। देवकीका आठौं सन्तानका रूपमा जन्मिएका कृष्णलाई वासुदेवले यमुना नदी पार गराई गोकुल पुर्याएका थिए, जसको संरक्षण स्वयं शेषनागले गरेका थिए।”
राति भने राजबिराजका मन्दिरहरू दीप–प्रज्वलन, भजन–कीर्तन र प्रवचनले उज्यालो बने। महिला–पुरुष दुवैले व्रत बसेर जाग्राम गरेका थिए। भक्तिभाव, उल्लास र कृष्णप्रेमले सजिएको राजबिराजमा यसपटकको जन्माष्टमी पर्व साँच्चिकै भव्य र अविस्मरणीय रह्यो।
